Lawngtlai District chhunga Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury 'S' MDC Constituency-a by-election neih tur chungchangah vawiin khan Lawngtlaia thu thar theh darhtute nen Returning Officer Dr Andrew H. Vanlaldika MCS hovin a office chamber-ah press briefing neih a ni.

He hunah hian Election Officer Pu Lalremruata Sailo MCS leh DIPRO Pu C. Lalhruaitluanga te pawh telin, MDC by-election kaihhnawiha chanchinbu leh electronic media kal tlanga mipuite hnena puanzar tul thil chi hrang hrang inhrilh a ni a. Returning Officer chuan inthlan neih zawh taka inthlan felfai tak neih a nih theih nana media lam thawh hlawkzia tar langin, tun tum MDC by-election atan pawh media-te thawhpuina tha tak a ngen nghal bawk.

Mizoram State Election Commission chuan he'ng bial pahniha by-election neih tur hriattirna hi nimin, May ni 27, 2019 khan a tichhuak a. Inthlannaa chuh tumte tan tunkar ningani, May ni 30 chawhnu dar 3 thleng Returning Officer, Dr Andrew H. Vanlaldika hnenah hming a pek luh theih dawn a; hming pek luhte hi hemi ni vek tlai dar 3 atangin endik (scrutinise) a ni ang a; inhnukdawk duhte tan May ni 31 tlai dar 3 thleng hun hawn a ni bawk ang. June ni 6 zing dar 7 atanga tlai dar 5 chhungin vote thlak a ni ang a; vote tlate chu Lawngtlaiah June ni 8 khian chhiar a ni ang.

Returning Officer Dr Andrew H. Vanlaldika chuan MDC by-election neih tur puan a nih tak avangin Lungtian leh Ugudasury MDC bialah te hian Election Model Code of Conduct hman nghal a nih thu a sawi a. Inthlan buaipuitu turte pawh ruat fel an nih tawh thu sawiin, vote thlak nan EVM hman a ni dawn a, VVPAT erawh hman tel a nih loh tur thu chanchinbumite hi a hrilh.

LADC hnuaia Lungtian bial hi MDC ni lai MLA-a thlan tlin a nih tak avanga ruak a ni a. He bialah hian polling station pali awmin, vote nei mi 1510 an awm. CADC hnuaia Ugudasury South MDC bial hi MDC tang lai a boral avanga ruak niin, polling station pahnih a awm a, vote nei mi 1544 an awm a. He biala Ugudasury South Polling Station chu venhimna uluk ngai zual (critical polling station)-a ngaih a ni.