699/2023-2024

Champhai, the 6th June, 2023: Champhai District Badminton Association (CDBA) buatsaih CDBA Season Opening Tournament 2023, June ni 6 atanga ni 9 thleng awh tur chu vawiin tlai dar 4:00 khan Champhai Town Hall-ah District Bawrhsap Pu James Lalrinchhana, District Sports Committee (DSC) Chairman ni bawk chuan khuallian niin a hawng.

Khuallian District Bawrhsap Pu James Lalrinchhana chuan Champhai District chhunga badminton infiamna tih hmasawn nana pawimawh tak, CDBA Season Opening Tournament 2023 buatsaih a ni chu lawmawm a tih thu sawiin, Category hrang hrang 10 laia intihsiakna siam a ni leh mi chi hrang hrangte tel theihna tura buatsaih a ni chu fakawm a ti a. Dan ang taka District Sports Committee din a nih hnua Chairman a nih anga hun a hman hmasak berna chu chhinchhiah tlak a tih thu sawiin, Champhai District Sports Committee lungrual taka din a ni chu lawmawm a tih thu a sawi a; hei hian infiamna chawisan kawngah Champhai District-ah malsawmna tam tak a hnuk lut thei dawn a ni, a ti bawk.

District Sports Committee Chairman chuan sawi chhunzawmin, Mizoram pum huap infiamna hrang hranga intihsiaknaah Champhai District-in theihna sang tak a nei tih lantira hlawhtlinna a chang thin chu chhuanawm a tih thu a sawi a. Infiamna chuan taksa chauh ni lo, rilru leh ngaihtuahna thlenga hriselna a thlen thin thu tarlang bawk a. District run mektu ruihhlo leh a kaihhnawih beihletna tha ber chu infiamna a nih thu sawiin, mipuite chu tha thlah lova ruihhlo do tur leh infiamna chawisan kawnga thahnemngai taka bei chhunzawm zel turin a sawm a. Champhai District chhunga Sawrkar hriatpui Sports Association 30 lai a awm thu pawh sawiin, tuaihnum leh cheithat a pawimawh thu a sawi a. Infiamnaa hlawhtling turin taksa leh thahrui chak tha mai bakah rilru huaisenna, tuarchhelna leh insumtheihna neih tel a pawimawh thu sawiin, infiammite chu infiamna chauh nilo, finna pe theitu dangte ngaisanga thiamna lama mi entawntlak nih tum bawk turin a chah a. CDBA te hmalakna fakawm a tih thu sawiin, District Sports Committee chak leh nung tak din kawnga tanlakpuiah a sawm nghal bawk.

He hun hi Pu Lalnunmawia, President, CDBA chuan a kaihruai a. Pu Paul Zakhuma, Gen. Secretary, CDBA & Referee chuan technical report pein kalkhawmte inhmelhriattirna hun a hmang a. Khuallian Pu James Lalrinchhana, District Sports Committee Chairman ni bawk chuan Tournament tanpui nan CDBA President kutah Rs 15,000/- a hlan a ni.

Champhai District Badminton Association (CDBA) Season Opening Tournament 2023 hi District Level Ranking Tournament niin, Champhai District hmun hrang hrang atangin Badminton khel thiam an kalkhawm a. Category 10 ahte intihsiakna buatsaih niin, category hrang hrang hnuaiah badminton player 149 an inlan thei dawn a ni.