698/2023-2024

Aizawl 6th June 2023 : Vawiin khan Environment, Forest & Climate Change Minister, Pu TJ Lalnuntluanga chuan 'Tamdil Wetland Interpretation Centre & Herbarium', Tamdil, Saitual District a mi chu a hawng.

Hawnna inkhawmah hian thusawiin, Minister chuan zirlaite leh research-ti turte tana tangkai tak tur 'Interpretation Centre & Herbarium' hawn a ni thei chu lawmawm a tih thu a sawi a, hetiang hawng thei tura thawktute in pekna leh thawhrimna chu fakawm tiin an hnathawh chu Mizo mipuite tan chhinchhiah tlak tak a ni, a ti.

Pu TJ Lalnuntluanga chuan chanchin tha avangin Zoramin nasa takin hma a sawn tih tarlangin sawrkar hna lo thawk tawh zawng zawngte, ram hruaitu lo ni tawhte inpekna leh thawhrimna avangin Mizoram pawhin nasa takin hma a sawn tiin ramin hma a sawn leh zualna turin tih tak takna leh neitu thinlungpu a hnathawh a ngai tih sawiin sawrkar hnathawk mek te pawh ram hmasawn nan an hna ah ti tak takna nena thawk chhunzawm zel turin a chah a ni.

A sawi zelna ah Minister chuan Mizoramin hma sawnna a hmuh chhoh mek laiin, mi thenkhat ten hmasawnna nei lo ang leh ram kal dan ah mipui ti beidawng thei zawnga thu thehdarh leh a chhe lam chauh sawi an awm thin a, chu chuan Thalai, mipui vantlang a tihhnual thin a ti a. A eng zawng leh beiseina nung nena hmathlir neih a ngai a, ngaihtuahna hman tlan a tul tawh takzet a ni, a ti bawk.Ram in hma a sawn zel theih nan theih tawp chhuaha Zoram leh hnam tan a thawhhona tha neih pui zel turin thawktu te leh kalkhawm te chu a sawm a ni.

Tamdil Wetland Interpretation Centre & Herbarium' hawnna inkhawm hi Pu Lallawmawma, Addl.DC, Saitual chuan kaihruaiin, Pu PC Lianzuala, ACF Aizawl Forest Division, in report pekna a nei a, Pu Lalnunsanga Khawlhring, DFO, Aizawl chuan lawmthu sawiin hun a khar a ni.

Vawiin vek khan EF&CC Minister, Pu TJ Lalnuntluanga chuan Tuirial-a Central Nursery, siam that leh chu a hawng nghal a. He nursery ah hian thingtiak chi hrang hrang 30 chuang awmin a vaiin thingtiak nuai 2 vel tun ah hian an enkawl mek a ni.