697/2023-2024

Lunglei the 6th June, 2023 - District Jail leh inkhunghranna Home hrang hranga awmte'n hriselna tha an neih theih nan leh, hri inkaichhawn theihte laka inven nana heng hmuna awmte dinhmun enfiah kawnga beihpui thlakna, 'Integrated STI, HIV, TB and Hepatitis (ISHTH) Campaign' Lunglei District chhunga kalpui tur chungchang zirhona leh inrawnkhawmna orientation meeting chu tlai khan Lunglei Additional DC Pu Liansangzuala Chhakchhuak hovin DC Conference Hall-ah buatsaih a ni.

Thukhawm chuan Integrated STI, HIV, TB and Hepatitis (ISHTH) Campaign khuhhawnna chu Lunglei Additional DC hovin June ni 9, 2023 hian Lunglei DC Conference Hall-ah neih ni se tih a ni a. Hemi hnu hian campaign neih chhunzawm nghal tur a ni a; campaign program kimchang duangtu tur Sub-committee din nghal a ni a. Ruahman dan chuan Lunglei khawpui chhunga District Jail bakah Home hrang hrang leh inenkawlna hmun thlan chhuah 8 ah te ISHTH Campaign hi kalpui tum a ni a, hriselna kawnga thiam bikna nei ten hriselnate endikin test tul angte leh counselling-te pawh an nei dawn a. Damdawi hmanga enkawl tul angte pawh buaipui tum niin, inzirtirna hunte hman zel tum a ni bawk. ISHTH Campaign hi thla khat chhung kalpui phawt tur a ni.

He hunah hian Dr Zodinpuii Hrahsel, Cluster Program Manager chuan PPT kaltlangin ISHTH Campaign chungchang tlangpuite zirtirna a pe a ni.

Integrated STI, HIV, TB and Hepatitis (ISHTH) Campaign hi a tum khatna tur a ni a.  Meeting-ah hian Civil Hospital, Christian Hospital Serkawn, Social Welfare, W&CD, I&PR, MSACS, Rescue Center, Mercy Home, TNT leh Chhawmdawlna In aiawhte koh an ni.