1059/2023-2024

Champhai, the 6th July, 2023: Champhai District Bawrhsap Pu James Lalrinchhana chuan vawiin khan Hnahlan Joint MHIP buatsaih MHIP Day lawmna hun, Hnahlan Community Hall-a neih chu khuallian niin a hmanpui. Khuallian hian MHIP te tan No set, silpauline leh sumfai a hlan a. Vawiin vek khan Hnahlan tlangdunga Polling Station-te tlawhin a enfiah bawk.

Khuallian Pu James Lalrinchhana chuan Hnahlan Joint MHIP member kalkhawmte MHIP Day chibai bukin, inunauna leh tanrualna tha tak hmanga MHIP Day lawmna an buatsaih chu fakawm a tih thu a sawi a. Sawrkar hmalakna tam takah MHIP te'n tha thawha a hlawhtlin theih nana an tawiawm thin chu chhuanawm tiin, an telloin khawtlang a famkim lo a ni, a ti a. Hmeichhiate chanvo tinung zel turin MHIP a din ngheh a ngaih thu a sawi a. MHIP member-te chu faina leh hriselna ngaipawimawh turte, ruihhlo laka fihlim turtein a chah a ni.

He hun hi Pi Zokhumi, President, Jt. MHIP chuan kaihruaiin Pastor Lalnunthara'n hunserh a hmang a. Member boralte sunna hun hman a ni a. Joint MHIP hnuaia Branch 4; Hnahlan North, Hnahlan South, Darnam leh Saron Branch atangtein report ngaihthlak a ni a. Pu Lalremruata Cherput, Hnahlan VCP in thu a sawi bawk a. MHIP Day pual hian thuthlung sawirualna, kumpuan thupui zirhona, kum 70 chunglamte chawimawina leh lengkhawm zai intihsiaknate buatsaih a nih bakah zai leh lamte hmanga hun hlimawm tak hman a ni a. Tlaiah MHIP Day pual ruai kilho a ni bawk.

Vawiin vek khan District Election Officer ni bawk Pu James Lalrinchhana chuan Hnahlan tlangdunga Polling Station hrang hrang; Zote Polling Station, Ngur Polling Station, Vapar Polling Station, Hnahlan I & II Polling Station-te tlawhin Assured Minimum Facility (Current, Ramp, Furniture, Toilet) te a enfiah a ni. Champhai District Bawrhsap hi Pu Moses Lalfakawma Tlau SDC leh Dr. Vanlalnunpuii Ralte SDC te'n an tawiawm a ni.