1058/2023-2024

Aizawl the 6th July 2023 : Vawiin khan I&PR Minister Pu Lalruatkima chuan Aizawl khawpui chhunga Veng pathum MHIP Branch - Kanan, Tuikual South leh Dinthar Branch - ten MHIP Day vawi 49-na an lawmna inkhawm a hmanpui.

MHIP Day lawmnaah hian Khuallian Pu Lalruatkima chuan thu sawiin kum 1974-ah nu thahnemngai tlemte ten Mizo Hmeichhe Insuihkhawm Pawl (MHIP) hi an din tan a, Mizo hmeichhiate hmasawnna tur leh chawikanna tura he hmalakna chu malsawma awmin vawiinah chuan Mizo hmeichhiate chu khawvel zau zawka hmeichhe dangte nena tehkhin pawhin an duai tawh lo hle a ni a ti. MHIP ten hmeichhe chanvo humhalh leh kawng hrang hranga an dinhmun siamthat hna ropui an thawh tawh zawng zawng chu rampum ang pawhin hriat a hlawh em em a, India President atang meuhin chawimawina sang tak ‘Nari Shakti Purushkar’ MHIP chuan a lo dawng tawh a ni tih a tarlang a. Mizo hmeichhiaten inneih, inthen leh ro chungchangah dinhmun hniam tak luah thin chu MHIP hmalakna avangin Mizote Customary Law hnuaia ‘The Mizo Marriage, Divorce & Inheritance Act’ chu siamthat niin nupa inthen leh inthihsan thulah pawh Mizo hmeichhiate chan a chhiat lutuk bik tawh loh thu a sawi bawk. Mizo hnam leh khawtlang inrelbawlnaah pawl pawimawh em em 3 a awm a, chung chu YMA, MUP leh MHIP te a ni a, pi pute hunlai atanga aia upate zah leh Zonun zemawi dangte chu a bo tan emaw tih tur khawpin tunlai thalaite khawsak duhdanah hmuh leh hriat hrehawm tak takte a awm tan tawh a, chumi siamthat hna leh Zonun zemawi tak chhawm nung reng tur chuan heng pawl 3-te an pawimawh em em a, a bik takin chhungkaw Nu berte awmna MHIP hian mawhphurhnaah lain mahni tu leh fate zirtir leh zilhna kawngah nasa lehzuala hma la zel turin a chah bawk.

Minister chuan ramdangten Mizoram leh hnam hi engtinnge min hmuh tih hi ngaihtuah reng tur a ni a, Mizote chu hnam huaisen, tlawmngai leh taima tiha an sawi zel tur chuan thawhhona tha leh tanrual zel a pawimawh a ni a ti a. Minister chuan nikum chhung khan Statistics-a lan danah chuan Kohhran pakhatah phei chuan nau thar piang chu 18 chauh an nei a ni tiin fa neih tlem aiin fa neih tam hi inzirtir thar ngaih hiala a hriat thu a sawichhuak bawk. Thu hrang hrang a sawinaah Minister chuan Faina leh Social Meida hman thiam lamah pawh tanlak a pawimawh takzet a ni a ti.

Vawiin MHIP vawi 49-na lawmna inkhawm a telna hmasa ber MHIP Kanan Branch hnenah Refreshment atan Rs.20,000 bakah MHIP Run sak zawm nan MLA Fund atangin cheng nuai 2 a pe a. MHIP Tuikual South Branch te hnenah pawh Refreshment atan Rs.20,000/- pein MHIP Run sak nan MLA Fnd atangin cheng nuai 3 a pe bawk a ni.