1057/2023-2024

Khawzawl, the 6th July, 2023: Deputy Chief Minister Pu Tawnluia chuan vawiin khan Khawzawl Arro Veng Branch MHIP Silver Jubilee lawmna Arro Veng Branch YMA Hall-a neih chu khuallian nia hmanpuiin Silver Jubilee lungphun a hawng. He hunah hian Khawzawl DC Pu K.Lalrohlua chu khualzahawm a ni.

Khuallian Deputy CM Pu Tawnluia chuan kalkhawmte chu MHIP Day leh Arro Veng Branch MHIP Silver Jubilee pual chibai bukin, Branch MHIP in kum 25-na hmel a hmu thei chu lawmawm a tih thu leh hemi thleng thei tura Pathian kaihhruaina ropui a tih thu a sawi a. Branch MHIP bultantute, hruaitu hmasa leh nilaite hmalakna leh inpekna chhuanawm a tih thu sawiin, hruaitu leh member tinte chu mawhphurhna an neihte thahnemngai taka hlen zel tum turin a fuih a. Mite tanpui kawnga hmalakna MHIP in thupui atana a hmang chu ropui a tih thu sawiin, khawvel nuam leh chenna tlak siam turin mahni hmasial mai lova, midangte tanpui duhna thinlung nei chhunzawm zel tur leh chhungkuaa zirtirna nei thin turin MHIP member kalkhawmte a chah a ni.

Pu Tawnluia chuan khawvel thang leh changkang zelah hmeichhia te'n nasa taka hma an sawn chu lawmawm a tih thu sawiin, zirna leh hnathawhna hmun hrang hranga an hmasawn dante a tarlang a. Awmnem zawk anga ngaih ni mah se, Pathianin finna leh remhriatna a pekte chhawr tangkaia mipain an tih theihte ti ve zel thei tura rilru paukhauh tak neih tum turin a fuih a. Kalkhawmte chu rinawmna leh takna nena midangte rawngbawl kawnga tan la turin a chah a. Kalkhawmte chu Mizo hnam ziarang, tawng, incheina leh nunphung thate chawisanga chhawmnung zel turin a sawm bawk.

Tuichang Assembly Constituency bialtu MLA ni bawk chuan tling lo taka mipui rawngbawl hna a thawhte hlutpui thiam a, a nihna phak baka khawtlangin an chawimawi chu ropui a tih thu leh a hriat reng tawh tur thu a sawi a. Khawzawl District kentel DRO Office Khawzawl Arro Veng-a sak mek chu Office pawimawh tak a nih thu tarlangin, veng chhung inkalpawhnate pawh a remchan dan ang zela siam tum a ni a, hei hi veng leh khawpui zauh zelna tur atana inruahmanna zel a ni, a ti a. Arro Veng VC hran siam a ni ta chuan khawtlang inrelbawlna kawngah awmze thui tak a neih phah nia a hriat thu leh VC thar hnuaia hmalaknate fakawm a tih thu a sawi bawk a. Arro Veng Branch MHIP Silver Jubilee lawmna chuan rilru hlimna leh lawmna bakah thlen chin atanga hmasawn zel duhna thlen se a duh thu sawiin, Khawzawl Arro Veng Branch MHIP te kalzelna turah duhsakna a hlan a ni.

Khualzahawm Khawzawl District Bawrhsap Pu K.Lalrohlua chuan Khawzawl Arro Veng Branch MHIP in Silver Jubilee lawmna hun tha tak an buatsaih thei chu lawmawm a tih thu a sawi a. Sawrkarin mipa leh hmeichhiate intluktlanna a ngaih pawimawh thu sawiin, hemi kaihhnawiha Dan hrang hrang Sawkarin a siamte a sawifiah a. Harsatna an neihte District Administration a thlen hreh lo turin a chah a. Sawrkarin hmeichhia leh naupangte hriselna a ngaihpawimawh thu leh scheme pawimawh tak takte a duan thu a sawi bawk a. MHIP member-te chu midangte tanpui kawnga an hmalaknate chhawmnung zel turin a fuih a ni.

Arro Veng Branch MHIP Silver Jubilee lawmna hun hi Branch MHIP President Pi Sanghlupuii'n kaihruaiin Pi Thangzuali, Executive Committee member-in hunserh a hmang a. Secretary Pi Lalhruaitluangi'n report a pe a. Pi Lalrinthangi, President, Sub-Hqrs. MHIP Khawzawl leh Pu K.Vanlalsiama, Arro Veng VCP te'n thu an sawi a. Branch MHIP Vice President Pi Hmangaihzuali'n lawmthu a sawi hnuah Adviser Pu Rohmingliana Colney-in banna a siam a. Hemi hnu hian Silver Jubilee lawmna ruai kilho a ni a, zan lamah jubilee lawmna program neih chhunzawm a ni ang.

Vawiin Khawzawl Arro Veng Branch MHIP Silver Jubilee lawmna hunah hian khawtlang hmasawnna kawnga a hnathawhte avanga lawmthu sawi nan Khuallian Deputy CM Pu Tawnluia leh amah tawiawmtu a nupui Pi Hmingmawii te khawtlang leh Branch MHIP hmingin chawimawina thilpek hlan an ni a. Heng bakah hian Arro Veng Branch MHIP hruaitu hlui, Miss Chapchar Kût leh kum 70 chin chunglamte chawimawina hun hman a ni bawk.