1056/2023-2024

Aizawl the 6th July 2023 : Vawiin hian Dr R Lalthangliana, Health Minister chuan Sialhawk Community Hall-ah, Sialhawk Branch-ah MHIP Day vawi 49-na khuallian niin a hmanpui a.

Dr R Lalthangliana chuan thusawiin, "MHIP Day vawi 49-na hmanpui thei che u a ka awm hi lawmawm ka ti hle a. Sialhawk tlangdung hi kut hnathawk nasa khua in ni a. Kumina Sawhthing in thar chhuah tawh zat quintal 5964 a tling a. Cheng nuai 370 zet Sialhawkin in la lut thei hi a ropui hle. Sialhawk khuaa sawhthing kumina in lakluh tawh zawng zawng quital 10000 chuang a tling tawh a ni," a ti bawk.

Dr Thangtea chuan, "Heti em em maia kuthnathawha hma inhruai mai hi a ropui ka ti hle a. Lakhuih thei pawh in thar tam hle tih ka hria a, ka lawm hle. Lakhuihthei thlum zawng test tawhah Sialhawk lakhuihthei a thlum ber, an ti bawk a ni. A lawmawm takzet a ni," a ti. 

Dr Thangtea chuan, "Nu ṭhain fa ṭha a hring ṭhin, tih hi ka hmuh dan a ni a. Nuin mawhphurhna lak tak tak hi a pawimawhin a ko a rit hle a. Zirna lama san tir ringawt ni lo, khua leh tui ṭha, ram leh hnam hmangaih, ruihhlo laka fihlim hring turin nute ka fuih thar duh a. Kan neih hlu ber kan fate kan hloh si chuan sum dehchhuah tam leh hausakin awmzia a nei lovang. He leia kan ro thil neihte ai hian ka Pathian laka kan rochan kan fate hi an hlu zawk a ni," a ti. 

Health Minister chuan, "Mihring hian kan daih rei lo. Mihring hian engti turin nge mihringte hi khawvelah hian min dah, tih hi a pawimawh. Rei lote khawvela kan cham chhung hian Pathianin eng mawh nge min pek, tih hi kan chhut a ngai. Kan fate puitling taka enkawl a, Pathian hnena hruai thlen hi kan mawhphurhna a ni," a ti.  

Pi Lalnunziri, Sialhawk MHIP President-in inkhawm hi a kaihruai a. Dr R Lalthangliana Sialhawk MHIP kutah ₹30000/- an Day lawmpui nan a hlan. 

Dr R Lalthangliana, Health Minister hian Khawhai PHC, Sialhawk PHC leh Biate PHC-te a tlawh a. An mamawh leh harsatna hrang hrangte sawipuiin tihhlawhtlin dan tur a sawi pui a. Hospital Poor Fund atan ₹5000/- ṭheuh a hlan bawk a ni.