1060/2023-2024

Khawzawl, the 6th July, 2023: Remna Ni puala Free Clinic Khawzawla neih kharna hun chu vawiin chawhnu dar 3 khan Deputy Chief Minister Pu Tawnluia, Tuichang AC bialtu MLA chuan khuallian niin a hmanpui.

Khuallian Deputy Chief Minister Pu Tawnluia chuan Health Department-te thahnemngaihna kaltlanga chawpchilh tak chung pawha Remna Ni pual Free Clinic Khawzawla hlawhtling taka buatsaih a ni chu lawmawm a tih thu sawiin, Health Minister hova thawkchhuak Doctor thiam tak tak leh Staff dangte inpekna fakawm a ti a. Health Clinic huaihawt a nih theih nana tha thawhtute chungah lawmthu a sawi bawk a. Health Clinic kaltlangin Khawzawl leh a chhehvela damlote'n damna an chan ngei a beisei thu a sawi bawk.

Free Clinic hi H&FW Department kaltlanga buatsaih niin, Khawzawl leh a chhehvel khaw hrang hrang atangin pantu an thahnem hle a ni. Free Health Clinic-ah hian Champhai District Hospital leh ZMC atangin Specialist rualte an tel a, an ni bakah hian District Hospital Khawzawl Doctor-te tel bawkin, an vaiin Doctor 13 leh Staff-te an tel a, inentir mi 675 (Medicine 248, Paediatric 175, Orthopedic 104, Gynaecology & Obstetric 120 leh Surgery 28) an awm a ni.

Health Clinic buatsaih nana senso hi Bialtu MLA Dy. Chief Minister Pu Tawnluia ruahman sak a ni a. Deputy Chief Minister chuan vawiin chawhnu vek khan District Hospital Khawzawla damlo awm mek 10 te chu Rs 500/- theuhin a kan bawk a ni.

Remna Ni pual Khawzawl Free Clinic kharna hun hi Team Leader Dr. Lalthlengliani, Joint Director, DHME chuan a kaihruai a. Dr. Albert  Lalhminghlua, Medical Officer, District Hospital, Khawzawlin lawmthu sawiin a khar a ni.