1061/2023-2024

Aizawl, July ni 6, 2023: Chief Minister Pu Zoramthanga chuan vawiin khan MHIP Day vawi 49-na lawmna inkhawm buatsaih chu a bial Aizawl East-I chhunga hmun hnih - Zemabawk North leh Thuampui ah a hmanpui. Zemabawk North Branch chuan an veng Judo Hall ah hun biatsaihin Thuampui Branch hian Rajat Hall-ah programme an buatsaih a ni.

Chief Minister chuan MHIP chu MUP leh YMA nen Mizoram in tlawmngai pawl lian a neih pathum, ramin a vanneihpui phah em em te zing ami a nih thu a sawi a. Heng kan tlawmngai pawl te anga khawtlang suihkhawm a, khawtlang hma ngai a, khawtlang tana hetiang khawpa thawk hi phai lamah leh ramdangah pawh hmuh tur a van viau a rin thu a sawi a. Mizo chu "disciplined society", vantlang nun invawng fel tak kan ni tiin khuallian chuan khawtlang nun felfai tak hi heng tlawmngai pawl te hnathawh ah hian thui tak a innghah thu a sawi a. Sawrkar hmalakna tam tak pawh amah lawng a hmalak ai chuan NGO kaltlanga hmalak a nih avanga hlawhtling tak zawk, state dang tan pawha entawntlak sawi tur a awm thin thu a sawi a ni.

MHIP member te chu inchhung enkawltu pawimawh an nih avangin khawtlang nunah pawh an pawimawh thu Chief Minister chuan a sawi a. Chhungkaw nun tha chuan society tha hring in, chu chuan ram nuam a hring chhawng leh zia sawiin hmeichhia te pawimawhna a tarlang a. Chhungkaw inrelbawl naah mipa an pawimawh ang bawkin nu an pawimawh tak zet thu a sawi.

Chief Minister chuan MHIP Day ah chuan kalkhawmte chu zu leh ruihtheihthil hrang hrang te, zuk leh hmuam lakah te fihlim a do pui turin a sawm a. Tunlai khawtlang nun ah chhung tin deuh thaw tibuaitu zu leh ruihhlo do kawngah theihtawpin sawrkar leh khawtlang, tlawmngai pawlte leh kohhran ang zawng te in tan la nasa viau a. Chutihlai chuan do hneh dan awlsam ber chu heng thil mamawhna (demand) a awmloh hi a ni tiin, mahni chhungkua theuh ah bultan pawimawh a tih thu a sawi a. Theihtawp chhuahin sawrkar pawhin ruihhlo do hna chu a thawk zawm zel ang a, mahse mitin mawhphurhna a ni tel tih ka hriat tlan pawimawh a tih thu a sawi.

Ruihhlo mai bakah taksa tan tha lo em em zuk leh hmuam lakah pawh fihlim tum hram pawimawh a tih thu a sawi a. Mizo zingah cancer vei kan tam hle mai a. Ram hmasawn tur chuan mihring hrisel an pawimawh thu te, nunphung hrisel zawk kan neih a pawimawh zia te sawiin Chief Minister chuan zu leh ruihhlo mai bakah zuk leh hmuam te pawh tih loh ngam pawimawh a tih thu a sawi.

Chief Minister chuan Mizoram chhehvel ram leh state te buaina chungchang sawi tel bawkin, sahimna zawnga kan unautr Mizorama rawn lut te thlamuantu ni thei dinhmun a ding, state ralmuang kan ni chu kan vanneihna leh malsawmna kan dawn a nih thu a sawi a. Chu remna leh muanna kan ram a awm hi midangte kawhhmuhtu, midang entawn ni turin leh he remna hi vawnhim tum tlat tur kan nih thu a sawi bawk.

Vawiin MHIP Day pual hian Chief Minister chuan a bial chhunga MHIP branch hrang hrangte hnenah lawmpuina pawisafai a pe bawk a ni.