1062/2023-2024

Lunglei the 6th July, 2023 – Vawiin khan YMA Sub-Headquarters Lunglei hnuaia Health & Sanitation Committee ten Deputy Commissioner, Lunglei leh Chief Medical Officer, Lunglei nena tangkawpin Relief Camp, Ṭhaizawl ah Free Medical Camp neih niin, Pu Zothanzuala Hnamte Secretary, YMA Sub-Headquarters Lunglei in a hawng.

Hawnna inkhawm tawi ah hian Pu PC Lalhmunsiama, Chairman,Health and Sanitation Committee in kaihhruai in inhmelhriattirna hun a nei a. Pu P. Thanngura, SEC i/c Health and Sanitation Committee in thu sawiin camp a awm mipuite a thlawna enkawl tura rawn kal Doctor leh technician te chungah lawmthu a sawi a, YMA Sub-Headquarters Lunglei ten vawiin atan a tul anga hman turin Ambulance an rawn thawh chu lawmawm a tih thu a sawi bawk.

Pu Zothanzuala Hnamte, Secretary, YMA Sub-Headquarters Lunglei in Medical camp hawnna hun neiin, Lunglei a damdawi dawr neitu ten damdawi tam tham tak an rawn pe chu lawmawm a tih thu a sawi a. YMA hian zohnahthlak unau te hi kan hmangaih a, amaherawhchu dan in a phalloh ruihhlo a inhnamhnawih an awm chuan an hruaitute hrilhhre zel turin a chah a ni. Raltlan Camp a awm te chu harsatna engpawh an tawk a nih chuan YMA in tanpui an inpeih reng thu a sawi bawk.

Free Health Campah hian Doctor panga(5)- Dr. Lalhlimpuii Murray(Gynaecologist), Dr. Lalhlimpuii(MBBS), Dr. K. Lalruati(MBBS), Dr. Lalzawmliana(Dental Doctor) leh Dr. Lalmuanpuii Renthlei(Dental Doctor) te an kal a. Mobile Medical Unit(MMU), CMO Office te nena tangdunin Damdawi sem chhuah hna hi thawh a ni a. Heng a hnuaia damdawi dawr aṭang hian Damdawi a thlawna sem chhuah tur dwwn a ni :

1. Malawm Pharmacy

2. LTP Pharmacy

3. Gilead Drugs Store

4. Tetei Pharmacy

5. Lunglei Medical Hall

6. J&S Pharmacy

7. PC Pharmacy

8. City Medical Store

Heng baka damdawi mamawh te hi Generic Store, Civil Hospital Lunglei ah lak niin, Deputy Commissioner , Lunglei in Damdawi man te hi a tum a. Dr. K.Pachhunga, MLA, Lunglei ‘S’ in Relief Camp hi rawn tlawh in, a hnen atangin Free Medical Camp atan hian Rs. 5,000/- dawn a ni bawk.

Damlo Inentir zawng zawng hi Mipa 54 leh Hmeichhia 91, an vaiin mi 145 an ni.