2316/2022-2023
Champhai, the 14th October, 2022: Champhai District Bawrhsap Pu James Lalrinchhana chuan vawiin chawhma dar 11 khan One Stop Centre (OSC) Champhai a tlawh. One Stop Centre Champhai hi Champhai Vengsang huamchhung Hospital Veng, DC Road-a awm niin, hleilenna chi hrang hrang tuar hmeichhia ten rikrum thila vanduaina leh harsatna an tawh pawha inhumhimna leh sahimna zawnga an tlukluh lailawkna leh tanpuina an dawn theihna tur hmun a ni.

Bawrhsap Pu James Lalrinchhana chuan khawtlang thatna tura One Stop Centre nung leh hriam tha tak Champhaia a awm chu chhuanawm tiin, pantu awm lo tur khawpa khawtlang tha leh thianghlim siam kawngah erawh tanlak zual sauh sauh a ngai a ni, a ti a. An hmalakna hrang hrangte chu chhuanawm a tih thu leh chhawmnung zel kawnga tha thlah lova tanrual zel a tul thu sawiin, OSC chu mi mangangte tana inhumhimna leh tanpui ngaite chhawmdawla tuamhlawmna hmun a ni, a ti bawk.

Hmalaknate puanzar nana program hrang hrang duan zingah 'Meet the Representative' tih zawh fel a ni leh, Zirna In a inhrilhhriatna hman tur leh Sawrkar Department hotute nena hun hmanho tur 'Tea with Official' kalpui turte chu finthlak a tih thu a sawi a. Nun tlahawlha boralna hial tawk thei mai turte hliam tuam dam sak a, an nun thlak hlawk thei tura hmangaih taka tanpuina an lo pe thin chu ropui a tih thu leh kristian nundan zemawi tak lantirna a nih thu a sawi a. Thawktute chu One Stop Centre-a an awm chhan ang ngeia anmahni pantute theihtawp chhuaha tanpui tur leh, an rawngbawlnate tha taka hlen zel tum turin a fuih bawk a. An hmalaknate District Administration chuan theihtawp chhuaha a thlawp tlat zel tur thu a sawi a, midangte tana malsawmna ni zel turin duhsakna a hlan a ni.

Thusawitu dang Pi Esther Leihang, Nodal Officer, One Stop Stop (OSC) Champhai chuan India ram danpui leh kristiannain hmeichhiate dinhmun chawikan leh humhim kawngah awmzia thui tak a neih thu sawiin, OSC pantute a tul anga ngaihvena buaipui an nih theih nan thawhhona tha leh hmalaknate mipui hriata puanzar uar zual a tul thu a sawi bawk a. An hnena tlulutte hna ropui tak thawk an ni tih hriaa hmangaih taka tuamhlawm zel tura chahin, an kalzelna turah duhsakna a hlan a ni.

He hunah hian OSC Special Campaign 2.0 puala hun hman niin, OSC hmalaknate leh hmachhawpte sawiho a ni a. Mamawh leh tul angte buaipui dan tur ngaihtuahho a ni bawk. Special Campaign 2.0 puala District Bawrhsap hova inkhawm tawi buatsaih hi Pi Malsawmkimi, District Centre Administrator chuan kaihruaiin, Pu Lalramchhana, Data Analyst-in hunserh a hmang a. Pi F.Lalcrownmawii, Para Medical-in kalkhawmte lawmna leh scheme sawifiahna hun a hmang a. Pi Julia Lalbiakzuali, Case Worker chuan lawmthu sawiin hun a khar a ni.

One Stop Centre (OSC) hi Sawrkar laipuia Ministry of Women & Child Development kaltlanga Social Welfare Department hnuaia din a ni a. Din tirh atanga vawiin ni thlengin case 84 nei tawhin, Aizawl District dawta case ngah ber an ni a; case tam ber hi inchhung khura hmeichhiate chunga hleilenna (domestic violence) pasal nei tawhte chunga thleng a ni a, heng bakah hian pawngsual, cyber crime, fa inchuh leh a dangte a awm bawk a. Champhai District bakah Khawzawl District-te chu OSC Champhai hian a huam a ni.

One Stop Centre Champhai hi mipat hmeichhiatna lam rawngkaia chhaih nawmnah leh pawngsual tawk te, diklo taka kut thlak, rikrap leh vauna tawk te, Social media-a thlalak leh video mawihnai lo tak thehdarh saka invauna leh intihmualphona te, nupa inthena mahni chanvo tur chhuhsak leh fa inchhuhluih sak te, dinhmun leh nihna vang emaw, hnam leh chi inthliarna avanga harsatna tawkte harsatna sutkian pui turin an inpeih reng a, engtik lai pawha pan theih reng an ni. A hmuna pantu mai bakah hian ralkhat atanga puihna awm thei angte pawh an buaipui sak thin bawk a. Harsatna nei anmahni pantute hi an nihna leh chanchinte thup sak tlat thin an ni a, uluk taka venhimna pek thin an ni bawk.

An hnena tlulutte chen lailawkna tur temporary shelter-te, puih ngai awm huna che chhuak vat tur emergency response te, dan lama inkaihhruaina legal aid-counselling te, damdawi lama inenkawlna medical assistance leh rilru lam thlenga inenkawlna psycho-social counselling-te an kalpui bakah, Police lam atanga puihna a awm reng bawk a ni.

One Stop Centre Champhai hi August ni 7, 2019 ah bultan a ni a. Tuna an awm mekna Office thar hi September ni 30, 2020 ah hawn niin, thawktu 8 in an awmchilh mek a, biakpawh theihnate chu:
i) Office No - 7085493106
ii) Centre Administrator - 9774609552
iii) Case Worker - 8131960234
iv) Para Medical - 9862311091