2317/2022-2023
Aizawl the 14th October, 2022 : Vawiin khan 2nd Hnahthial District Secondary School Games, Hnahthial District Volleyball Association, Volleyball Court-a neih chu a kharna hunah Health Minister Dr.R.Lalthangliana, bialtu MLA ni bawk chu khuallian a ni.

Dr.R.Lalthangliana chuan Hnahthial District-a Volleyball games kharna hun tluang taka an hmang thei chu lawmawm a tih thu sawiin zirna piah lamah sports lam thlengin Hnahthial District a thangharh ta hi a lawmawm takzet a ni, a ti. Zirna atan hriselna neih that a ngai a, chu mi atan chuan infiamna lam ngaihsak leh tihtam hi zirlaite tan a pawimawh, Health Minister chuan a ti a. Engang pawhin lehkha thiam mah ila, hriselna kan hloh chuan engkim kan hloh a, hriselna tha nei tur chuan infiamna lamah exercise lak that a pawimawh a, lehkha thiam tur chuan infiam nasat a ngai a ni, a ti bawk.

Dr R.Lalthangliana chuan tun laiah ruihtheih thil avangin thalai nun tawi tak tak an tam hle chu a pawi tak zet a ni, a ti a. Zirlai leh infiammi kalkhawm te chu ruihtheih thila fihlim a, nasa taka infiamna leh zirna ngai pawimawh theuh turin a fuih a. Hnahthial District infiamna lamah an hniam lohzia sawiin he district atanga rampum huapa langsar, India ram aiawh pawha chhuak thin, infiammi hlawhtling tak tak an neih te hming lamchhuakin chhuanawm a tih thu a sawi a. “Volleyball leh infiamna hrang hrangah tan lo la zel ang che u," tiin Health Minister chuan a bial mipuite a fuih a ni.

2nd Hnahthial District Secondary School Games October ni 11 ah neih tan a ni a. Vawiin kharna inkhawmah hian lawmman semna hun hman nghal a ni.

Programme hi Pu Micky Lalenkawla DEO/DPC Hnahthial chuan a kaihruai a. Nula J.Lalchhanchhuahi Mizo Idol Top Ten zinga mi chuan zaiin kalkhawmte a awi a, Govt.H/S Hnahthial-te chuan cultural lam an entir a ni.