2318/2022-2023
Aizawl, the 14th October 2022: Governor Hari Babu Kambhampati chuan vawiin chawhnu khan Saitual Town chhunga Saitualah leh Keifangah te PMAY(U), PMUY leh MNREGA hnuaia tanpuina dawngtute a tlawh.

Governor Hari Babu Kambhampati in Beneficiary a tlawhchhuah te hi PMAY(U) atanga insak tanpuina hmanga in sa thar chhungkua te, PMUY atanga Gas Connection nei thar te leh MNREGA hmalakna atanga Tui dahkhawlna nei thar te an ni.

Governor hian beneficiary te hi hmaichhanah zawhna hrang hrang te zawtin scheme atanga tanpuina an dawn chungchangah te an ngaihdan te a zawt a ni. Beneficiary te hian central sawrkar tanpuina an dawn avanga an dinhmun te a hma aiin a lo ziawm tak avanga an lawm thu te an sawi a. An hamthatna dawn tur te a puitlin theihna tura state sawrkar hnathawh leh a viltu official te puihna avanga an lawm thu pawh an sawi bawk a ni.

Governor Hari Babu Kambhampati chuan Central sawrkar tanpuina avanga in thar nei te, gas connection nei thar te leh tui dahkhawlna siam thar te a lawmpui thu a sawi a. An hlawhtlinna kawngzawh chungchangte midang hnena sawi tam tur leh an hmelhriat zinga tanpuina dawn mamawh nia an ngaih te pawh hrilh ve turin a fuih a ni. Central Sawrkar scheme tha tak tak te beneficiary ten a hun taka an dawn a, a tangkaina an chhawr hma theihna turin a buaipuitu official te pawh tan la chhunzawm zel tur leh hna ti khawmuang lo turin a chah bawk a ni.

Pu VL Hruaizela Khiangte, Saitual DC, Pu J.Lalmuankima, SP, Saitual, Pi Margaret Lalrinawmi Fanai, Addl DC & PD, DRDA, Saitual leh official ten Governor hi an zui a ni.