2319/2022-2023
Kolasib dated 14th October 2022: Vawiin khan Zero Point Bazar Shed, Bairabi South-ah, tlawng lui lian in a Bairabi khaw chhunga chenna in leh khawchhung hmun thenkhat a lak hek thin te ven a nih theih nana ruahman,‘Construction Of River Training Works For Protection Of Tlawng River At Bairabi Phase-1’ bultanna turin Pu K.Lalrinliana, Minister of State, Local Administration Department chuan lungphum a phum.

LAD Minister Pu K.Lalrinliana chuan tui lian vanga Bairabi khawtlangin hun rei tak ata harstana an lo hmachhawn thin chhawk zangkhai a nih theih nana hmalakna bultan a ni tur chu lawmawm a tih thu sawiin bultanna a nih angin a tul ang zelin hmalakna kalpui chhunzawm zel tum a nih thu a sawi. Bairabi chu Mizoram luhka pawimawh tak a nih angin LAD Department kaltlangin Bus Terminal changtlung tak sakna tur leh intihhlimna hmun, 'Chawlhna tui kam' sakna turin ruahmanna kalpui mek a nih thu te, NH 154, Bairabi - Meidum inkar kawng zauhna tur a Balance work kaltlangin khawtlang him leh nuam siam nan kawng zauh hna thawk turin hmalak mek a nih thu Minister chuan tarlangin khawtlang tan a thil tha siamna kawng a hma latute tha tak a tawimawmtu ni zel turin kalkhawm te a chah.

LAD leh PWD tangkawp hmalakna a tui lianin lei a lak tur venna siam a nih bak ah Sawrkar hmalaknain Kolasibah khum 100 awm theihna District Hospital leh Fast track Court building sak hna tan tur a hmalak mek a nih thu Pu K.Lalrinliana chuan tarlangin heng sawrkar hmalaknate hi mipui ta tur a nih ang takin neitu nihna thinlung puchunga a sak lai atanga uluk tak a zilpui turin mipuite a chah bawk a ni.

Vawiin ‘Construction of River Training Works for Protection of Tlawng River at Bairabi Phase-1’ lungphum phumna hun hi Pu David Lalthantluanga, Secretary, LAD in kaihruaiin Er. C.Lalchhuana, CE, PWD, Highway in technical report a pe a. Bairabi khawtlang leh tlawmngai pawl hruaitute atangin thusawi ngaihthlak niin Pi Rita Lalnunmawii Pachuau, Director LAD chuan Local Administration Department hnuai a hmalakna hrang hrang tarlanna hun te neiin Pu Lalchawimawi, Joint Director, LAD chuan lawmthu sawina hun a hmang bawk a ni.

Technical Report-a tarlan danin he Project-in a tum ber chu Bairabi khaw chhung, Tlawng kam, tui lianin Mizoram lam a tih chhiat zel tur venna tur siam a ni a. A siam dan tur tlangpui chu Tlawng kam ah mumal tak a lung (boulder) rem tur a ni ang. Kum 2019 atang khan Local Administrative Department (LAD) hnuai ah Blue Hill Engineering-in tui len dan leh a thil tih chhiat dan te zir chianna a lo nei tawh a. Chumi zulzui chuan vau kam ven dan tur ruahmanna pawh siam niin tui lianin vau kam a tih chhiat tur ven ngai hi km 1.50 vel anga chhut a ni. A thawhkhatna atan hian NABARD kaltlangin Phase-1 ah hian 300 meter velah hmalakna kalpui a ni dawn a ni.

Bairabi town area hi sq.km 26.00 vela zau a ni a, kum 2011 chhiarpuiah khan sq.km khatah mihring 166 awm ang an ni. Tun dinhmun ah chuan Mizorama kan rail station neih chhun a ni a, Food Corporation of India (F.C.I) Godown lian a awm bawk. Rel head a nih avang hian state dangte nena kan insumdawn tawnna, thil lak luh leh thawn chhuahna hmun pawimawh tak a ni mek a ni.

Bairabi khaw sirah hian Mizorama lui sei ber, Tlawng lui a luang a. He lui hi lawngleng hmanga thil thiar vel nan a tangkai hle. Chutih rualin Bairabi khaw bulah Teirei luiin a rawn fin a. Fur tui len lai chuan Tlawng lui tui tam dan hi 19380.00 Cumec a nih laiin Teirei hi 5971.36 Cumec a ni. (Cumec = tui luan chak zawng tehna – second khatah cum khat emaw 1000 lit.

Teirei lui hian Bairabi khaw zawn takah Tlawng lui a rawn fin a. A lui len loh ngaihtuahin Tlawng lui a rawn finnaah hian a rawn nek na em em mai a. Fur tui len lai phei chuan li vir a rawn siam a. Chu li vir chuan vau kam a rawn nawr hek ta thin a ni.

Kum 1970 vel atang khan tui lian hian Bairabi vau kam a rawn ei tan tawh a hriat a ni a. Kum 1990 chho atangin hriat thamin ram leh thlai a ti chhia a. Kum 2004 atang chauhin chhinchhiah a dahthat a ni. Kum 2004 atanga 2018 thlenga tui lianin a tih chhiat record kan hmuhte chu chenna in 47, in dang 12, huan thlai eng emaw zat a ni a, heng zingah hian biak in 2 a tel bawk a ni.

Phase-I atan Rs. 11,11,10,000.00 ruahman a ni a. NABARD leh State sawrkarin an intum sem ang (90 : 10). NABARD-in nuai 1000 a tum ang a, Mizoram sorkarin nuai 111.10 a tum ang. Hna hi tan a nih atanga thla 12 chhunga zawh tur a ruahman a ni a. Ni 10.10.2022 khan work order pek chhuah niin  kum 2023 October thla a zawh hman beisei a ni.