2320/2022-2023
Aizawl, the 14th October 2022 ; Vawiin khan Health Minister leh South Tuipui bialtu MLA ni bawk Dr. R. Lalthangliana’n Hnahthial District Treasury Office, Hnahthial Bazar veng a mi chu a hawng a, Zofa Run Lungleng veng, Hnahthialah hawnna inkhawm neih a ni.

Dr. R. Lalthangliana chuan District a Treasury Office chu Department zawng zawngte office in tawm, a tel lova awm thei miah loh, pisa pawimawh tak a ni, Hnahthal District mipuite pawhin hun rei tak atangin an hawn hi an nghakhlelh a, vawiin hawn a ni ta hi thil lawmawm leh chinchhiahtlak tak a ni, a ti. Department tam tak thawktu indaihlo awm zingah Account & Treasuries Department pawh indaih lo tak nichungin he lai hmuna thawk tur an in dah thei hi a lawmawm hle a, hemi atana a tul zawng zawng min tihfel sak tu Chief Minister, Finance Minister ni bawk leh department chungah lawmthu kan sawi a ni, a ti a. District-a Head of office chelhtu hrang hrangte hi Treasury office nen thawhhona tha tak nei a, inpawhna tha tak nei turin ka chah duh che u a ni, a ti bawk.

Hnahthial District, Khawzawl District leh Saitual District-te chu 2008 a Sawrkar tawp dawn District capital-ah puan anih thu sawiin, Sawrkar hmasa kum 10 khan hma an la thei ta si lo a, tun term-ah thla 8 chhung lekin kan tithlawhing thei ta a ni, a ti. Covid hripui len hmaa District puan kha thil vanneihthlak leh a hun tak nia rin thu sawiin Covid karah khan a puan a harsa ngawtin a rinawm, a ti. Tun atanga rei loteah Hnahthialah District Fishery Office leh DTO office pawh hawn theih a beisei thu sawiin DC office thar leh CMO office sak mek pawh nakum kum laihawl vel hawn theih a beisei a ni, a ti.

District Treasury Office hawnna inkhawm hi Pu R.Lalremsanga DC Hnahthial chuan kalkhawmte lawmna thu a sawi a. Pu Thara Lungtau Joint Director, A & C chuan Hnahthial District Treasury Officer thar lo pian dan report a pe a, Pu Vanlalrosiama Ralte, Treasury Officer Lunglei chuan lawmthu sawiin hun a khar.

Minister hi Aizawl atangin Pi Lalsangpuii, Addl. Director (Commerce) C & I Dept. Pu Thara Lungtau Joint Director, Account & Treasuries, Pi Hrangthanthuami Hmar, Superintendent, Chief Controller of Account & Treasuries leh Pu R.Lalremsanga MCS, Hnahthial DC, Pu Lalbiakkila MPS, SP Hnahthial leh Official dangten an tawiawm a ni.