571/2024-2025

Champhai, the 27th May, 2024: Champhai District Bawrhsap Pu James Lalrinchhana, Chairman, District Level Committee on Myanmar and Bangladesh Refugees (DLCM&BR) chuan vawiin chawhnu dar 3:00 khan Myanmar atanga raltlante chhawmdawlna pek chungchang Relief Agency hrangte hrangte a sawipui.

Pu James Lalrinchhana chuan kalkhawmte lawmna thu sawiin, Champhai District chu raltlan ngah ber District a nih thu a sawi a. Raltlan chhawmdawl leh tanpui kawnga Relief Agency hrang hrangte hmalakna fakawm a tih thu sawiin, theihtawp chhuah chhunzawm zel turin a fuih a. Tunhnaiah Vaikhawtlang, Khuangphah leh Hnahlan khuaahte raltlan lut thar mi engemawzat an awm belh thu tarlangin, Relief Agency-te chu raltlante tanpui leh chhawmdawl kawngah thawhhopuiah a sawm nghal bawk.

Meeting-ah hian Relief Agency hrang hrang Catholics Relief Services, Zoram Entu Pawl, Adventist Development and Relief Agency, Doctors Without Borders India leh Jesuit Refugee Service-te telin an hmalakna theuh an tarlang a. Relief Agency hrang hrangte chu rualkhai zawka tanpuina an sem dan turte sawipui an ni. He huna tarlan a nih dan chuan tun dinhmunah hriat theih chinah Champhai District-ah thenawm ram Myanmar atanga raltlan mi 15,505 an awm mek a ni.

He hunah hian Addl. DC Pu K. Zorammuana leh District Official dangte an tel a ni.