570/2024-2025

Khawzawl, 27th May 2024: Vawiin khan Khawzawl DC Meeting Hall-ah Khawzawl District ‘Inspection and Monitoring Committee on Prevention of Illegal Transportation of Children’ chu an Chairman Khawzawl Bawrhsap Pu K. Lalrohlua hovin an thu khawm a. Dan kalha naupang kumtlinglo hruai bo tih tawp leh ven dan tur an sawi ho.

Thutkhawm kaihruaitu Bawrhsap Pu K. Lalrohlua chuan kalkhawmte inlawmna thu a sawi a. Naupang kumtlinglote venhimna kawngah an mit leh beng len a, theihtawp chhuah theuh turin a ngen a ni. Chairman hian inlawmna thu a sawi zawhah Khawzawl District chhunga naupang venhimna kawnga thawktu – District Executive Force (SP Office), District Child Protection Office (DCPO) leh Child Welfare Committtee (CWC) te hnen atangin an hmalakna leh hmachhawp hrang hrang te ngaihthlak a ni.

Khawzawl District Child Protection Officer Pi Lalsiammawii chuan Mizoram chhunga naupang hruai bona case hrang hrang awm tawh te a sawi fiah a. Thiam thil bik nei lo tan ram pawnah pawisa tam tak hlawh ngawt a theih loh thu mitinin an hriat a tul tih a sawi.

Khawzawl District SP Pu Lalchhuanthanga chuan Mizoram Police hnuaiah District tinah Anti-Human Trafficking Unit din a nih thu a sawi a. Mihring hmanga insumdawnna kaihhnawih chu SP, CID (Crime) hnuaiah chhui thin a nih thu te, Khawzawl Police Station-ah pawh Child Friendly Room leh Women Help Desk te dah a nih tawh thu  a tarlang bawk.

Khawzawl District Child Welfare Committee Chairman Pu PC Rosiama chuan ramdanga hnathawh tum te chu Agency rintlak kaltlanga kal hram hram tura inzirtir a tul thu leh High School leh Higher Secondary School-ah te zirtirna kal pui thaa a hriat thu a sawi.

Vawiin thutkhawm hian Khawzawl SP hnuaia Anti-Human Trafficking Unit chu chak zawka kal pui tha an ti a. District Child Protection Office-in High School leh Higher Secondary School-ah Human Trafficking kaihhnawih inzirtirna kal puina tur ‘Handout’ lo buaipui se, zirtirna hi Elementary School-ah te pawh kal pui tum ni se tiin an rel a. Public Transport – Sumo, Taxi etc te chu an mi phurh teah he lam kaihhnawih rinhlelhawm an awm a nih chuan thuneitute hnena thlen vat turin an ngen bawk a ni.

Vawiin thutkhawmah hian sawrkar official-te bakah Khawzawl District-a khawtlang leh tlawmngai pawl hruaitute, Mizoram Journalist Association te, Taxi leh Maxi Cab Owners Association hruaitute an tel.