DIRECTORATE OF INFORMATION & PUBLIC RELATIONS, Government of Mizoram, India

569/2024-2025

2024 Ṭomir thla ni 27: Vawiin khan Lawngtlai District Level Committee on Green Mizoram chu Lawngtlai DC Conference Hall-ah Lawngtlai Additional Deputy Commissioner Pi B. Malsawmtluangi hovin an ṭhu khawm a. Lawngtlai District-a Green Mizoram Day 2024 hman dan tur an rel.

Chairman Pi B. Malsawmtluangi chuan environment veng him tur leh ṭhangtharte tana chenna tlak khawvel hnutchhiah turin ngaw awm sa humhalh leh a thar siam belh kawngah tun aia nasaa hma lak a ṭul tih sawiin, sawrkar department, pawl leh mimal tinin mahni zawnah ṭheuh theih tawp chhuah bakah, a theihna apiangah thawk hova hma lak a ṭul tih a sawi a. Green Mizoram Day 2024 pawh hlawhtling taka hman a nih theih nan member-te chu ngaihtuahna seng turin a sawm a ni.

Member Secretary Pu K. Lalromawia, District Council Conservator of Forests, LADC chuan Green Mizoram Day hman ṭhin dan tlangpui a sawi fiah a. Nikum 2023-a Lawngtlaia Green Mizoram Day hmannaah thing ṭiak 380 phun a nih thu leh 247 (65%) a nun thu sawiin, a nung lote pawh LADC EF&CC department-in thing ṭiak danga thlak a, ngun taka an enkawl zui ṭhin thu a sawi a. Green Mizoram Day chu Lawngtlaiah kum 2000 aṭanga hman ṭan a nih thu te, thing ṭiak 19,500 chuang phun a nih tawh thu leh 63.5% vel nung leh puitling anga chhut a nih thu a tar lang bawk.

Vawiin ṭhut khawmah hian kumin Green Mizoram Day June ni 11 (Thawhlehni) chu thing ṭiak phun ni atan hman leh ni se, tih a ni a. Kaladan Multi Modal Transit Transport Project (KMMTTP) kawngpui kamah, nikum lama thing phun tawhna piah lam, Lawngtlai aṭanga kilometre 9 velah kumin hian thing ṭiak 330 phun ni se, tih a ni a. Chawhma dar 10:30-ah Lawngtlai Bawrhsap pisa tualah Green Mizoram Day hawnna buatsaih ni se, Khuallian atan Lai Autonomous District Council (LADC)-a Chief Executive Member Pu C. Lalmuanthanga beisei ni se, tih a ni a. He hunah hian kumina kangmei ven kawnga thawk ṭha khua/veng thlan chhuahte hnenah Village Level Fire Prevention Award lawmman hlan ni se, tih a ni.

Vawiin ṭhut khawmah hian kumin Green Mizoram Day thupui atan "I nunna atan thing phun rawh" tih hman tur a nih thu tar lan a ni a. Department hrang hrangte'n mahni thing phun ṭheuh enkawl zuiin, enkawl puitlin ngei tum ni se, tih a ni a. Lawngtlai khawpui chhungah khawpui cheina leh daihlim siam tura thing phun theih dan tur ruahmanna siam ni se, tih a ni bawk.

Vawiin meeting-ah hian sawrkar department hrang hrang hotute, zirna in leh tlawmngai pawl ai awhte leh District MJA hruaitute an tel a ni.

Attachment