1923/2022-2023
Champhai, the 14th September, 2022: PHED, Champhai WATSAN Division leh Swachh Bharat Mission - Grameen (SBM-G), Champhai District kaltlanga faina kawnga hmalakna pakhat ‘Swachhata Hi Seva 2022, Faina hi Rawngbawlna a ni’ tih, India ramin zalenna a hmuh kum 75- na lawmna kalzel Azadi Ka Amrit Mahotsav puala buatsaih tur hawnna hun chu vawiin chawhnu dar 3 khan CHANEM Building Ground Floor-ah neih a ni a. He hun hi District Bawrhsap Pu James Lalrinchhana, District Water & Sanitation Mission Chairman ni bawk chuan khuallian niin a hmanpui a, Champhai District chhunga Swachhata Hi Seva 2022 kalpui tur chu a hawng a ni.

Khuallian Pu James Lalrinchhana chuan faina chu mimal tin atanga tan a pawimawh a, keimahni kan fai a, kan thenawmte an fai si loh chuan faina tak tak a ni thei lova, faina tak tak nei tur chuan kan zavaia kan fai tlan vek angai a ni, a ti. Plastic lam leh plastic atanga thil siamchhuah hmang tlem zel tura kalkhawmte chu chahin, faina beihpuithlak chu PHED lam tih turah chauh dah lovin mimal tinte chu an mawhphurhna theuh a ni tih hre thar leh turin a chah a. Tawih thei leh theilo bawlhlawh thliar leh sawngbawl kawngah mitinte hma la zel turin a chah bawk a. Faina chu mitin mawhphurhna a ni a, kan inchhung, kan chenna in leh a velte kan vawn thianghlim reng angai a, kan chenna in leh a velte kan vawn thianghlim theuh chuan mitinte tun aiin kan hrisel zawk dawn a ni, a ti a. Khuallian chuan tui thianghlim chu mitinte hriselna atana pawimawh a nih thu sawiin, tui in tur thlan kawngah fimkhur a tul a, PHE tui sem, filter leh chhuanso chauh in thin tur a ni, a ti bawk.

He hun hi Er. C.Lalhmachhuana, Superintending Engineer, PHED & Executive Vice Chairman, SBM-G, Champhai District chuan a kaihruai a. Er. Z.D. Dengthuama, Executive Engineer, PHED Champhai WATSAN Division & Member Secretary, District Water & Sanitation Mission & SBM-G, Champhai District-in lawmthu sawiin hun a khar a. He hunah hian Champhai khawpui chhunga Sawrkar Department hrang hrang hotute, School naupangte leh khawtlang hruaitute an tel a. Programme hman zawh hian PHE Staff te'n khawchhung tifaiin hnatlang an nei nghal bawk.

Swachhata Hi Seva (Sanitation is Service) tih hi Mizo tawng chuan ‘Faina hi Rawngbawlna a ni’ tih a ni a. Swachhata Hi Seva (SHS) hi thupui thlan bik neiin kum tina neih thin a ni a, kumin bik atan hian "Khaw chhung hmuh theiha fai taka siam" (visual cleanliness in village) tih thupui hmangin India ram pumpuiah September ni 15 atanga October ni 2, 2022 chhung hian neih leh tur a ni. Thingtlang kilkhawr ber thlenga faina pawimawhzia inzirtira nunpui zel tura hrilhfiahna neihte a huam dawn bawk a ni.