No.1312/2021-2022 

Dated Champhai, the 9th July, 2021: Vawiin chawhma khan Champhai Officers' Club (COC) chuan Champhai District mi leh sa, tunhnaia zirna kawnga hlawhtlinna changte chawimawina hun I&PR Auditorium CHANEM-ah a buatsaih. He hun hi District Bawrhsap Pi Maria C.T Zuali, Champhai Officers' Club Patron ni bawk chuan khuallian ni a telpuiin, chawimawina thuziak cheimawi leh lawmpuina pawisafai a hlan a ni.

Khuallian Pi Maria C.T Zuali chuan Champhai District tihmingthatu zirna kawnga hlawhtlinna chang tharte chu thinlung taka a lawmpui thu sawiin, chawimawite chanchin tlangpui a hriat chuan a rilru a hneh thu leh thawhrimna hi hlawhtlinna bulpui a ni tih an entir thu a sawi a. Uar zawka zirna chawisan kawnga hmalak a tul thu sawiin, thil kan zir tam pauh leh thluakah finna leh hriatna kan tuh hnem theih phah a, chem hman ngai loh a bil ang hian thluak hman tam loh reng reng chu a bil thin a ni, a ti bawk.

Zirna kawnga hlawhtlinna changte chu an hlawhtlinnaah duh tawk mai lova, tawp lem neilo zirna kawnga bultan chauh leh hmabak tam tak nei an ni tih inhriaa theihtawp chhuah chhunzawm zel turin a fuih a. Mizo ten zirna kawngah nasa zawka tanlaa rual kan el a ngaih thu pawh sawiin, Mizoram mai nilo India ram puma ti tha ber ni thei tura tanlak a pawimawh a ni, a ti a. Hmasawn tuma thahnemngai taka zir chhunzawm zel tura chahin, an kalzelna turah duhsakna a hlan a ni.

Vawiin Champhai Officers' Club buatsaih zirna kawnga hlawhtlinna changte chawimawina hunah hian Champhai District atanga HSSLC Examination -2021, Top ten-a langpha zirlai pathum; Commerce-a parukna Esther Lalrinsangi D/o P.C Lalzarliana, Project Veng, Vengsang Champhai, Arts-a pakuana Z.D Lalthlamuani D/o Z.D Malsawma, Vengthlang, Champhai leh  sawmna K.Vanlalruatpuii D/o K. Lalbiakdika, Vengthar, Champhaite hnenah khuallianin chawimawina thuziak cheimawi leh pawisafai Rs 5,000/- theuh a hlan bakah, AIIMS Jodhpur atanga Doctorate of Medicine (DM) Nephrology hmu thar, Dr. C. Malsawmkima S/o K.L Chhuma (L), Khuangleng, Mizo zinga Nephrology Superspecialist hmasa ber hnenah chawimawina thuziak cheimawi leh, East Tuipui bialtu MLA Pu Ramthanmawia kaltlanga lawmpuina Rs 5,000/- a hlan bawk a ni.

He hun hi Pu P. Lalhmingliana, President, Champhai Officers' Club chuan kaihruaiin, Secretary Dr. Lallawmkima hnen atangin report tawi leh chawimawite chanchin tlangpui ngaihthlak a ni a. Pu Lalnunfela Chawngthu, Fin. Secretary-in lawmthu sawiin hun a khar a ni.