No.4110/2021-2022
Aizawl, the 25th February, 2022: NEC Fund cheng nuai 359.21 kaltlanga ruahman Samthang khaw lu a Zopui Phul Samthang Nature Park siam chu vawiin khan Champhai District Bawrhsap Pi Maria C.T Zuali chuan ribbon chepchatin a hawng.

Khuallian Pi Maria C.T Zuali chuan Samthang khaw bul maia hmun mawi leh nuam tak, Dil mawi tak awm tel bawk khualhip thei tura cheibawl leh siam kawnga hmalak tulnate hriain Mizoram sawrkar kaltlangin NEC ah project thlen a nih thu leh, Chief Minister-in a tul anga a bawhzui sak avanga hmalakna kalpui a nih thu a sawi a. Tun dinhmun thlen theih nana thahnemngai taka thathawhtu line department hrang hrang hotute leh khawtlang hruaitute chungah lawmthu sawiin, Eco Park a nih angin a chhungah concrete building ropui tak tak din lovin a hmun mawina leh nawmnate vawnghim chung zela khualzinte tlawh leh chetvelna tura buatsaih mek zel a ni, a ti bawk.

Kan ram mawina leh a chhunga thil awmte ngaihhlutna chang kan hriat a ngaih thu sawiin, ram dangin an tih theih chu kan ti ve thei tur a ni, a ti a. Pipu sulhnu tamna Champhai District-in khualhip thei tur khawpa theihna nasa tak a nei chu vanneihthlak tiin, a cheibawl leh chawilar kawngah tanlak nasat zual angai a, a puitlin theih nan a tul angte bawhzui mek a ni, a ti bawk. Zopui Phul Samthang Nature Park Official-a hawn a nih hma December 2021 thla chhungin Rs. 90,000 lai tlawhtute atanga dawn a nih thu pawh sawiin, khualthlen leh chhawn kawngah a khaw mipuite tuaihriam chu ngaihpawimawh a ni, a ti a. Zopui Phul Samthang Nature Park vawnfai leh enkawl kawngah a khaw mite mai bakah a tlawhtute neitu thinlung pu tlat thin turin a chah a ni.

He hun hi Pu C.Lalrintluanga, Samthang VCP chuan kaihhruaiin kalkhawmte lawmna thu a sawi a. Upa DL. Vanlalrova'n hunserh hmangin Pu Obed Lalmalsawma, SDC in technical report a pe a. Champhai Samthang Welfare Committee aiawhin Pu PC Vanlalchhuana'n lawmthu a sawi a. Hawnna hun neih fel hnu hian Official leh he hun hmang tura kalkhawmten Zopui Phul Samthang Nature Park cheibawl kawnga hmalakna hrang hrangte an fang kual nghal bawk a ni.

Zopui Phul Samthang Nature Park hi NEC Project kaltlanga thawh niin, 2021 April tanga tan a ni a. Project kentel langsar zingah hian Aproach road, Dilpui tuikhuah leh lenvelna lawng, chhungkaw 6 tan homestay, Eco toilet, Log Cabin, Eco-Cafeteria, Camping & hiking equipment, Orchid house and propagation centre leh Bazar shed-te siam a ni a. A khaw mite tan khual thlen leh tul dang inzirtirna training hrang hrang buatsaih mek zel a ni a, Handicraft & handloom training neih hmabak a ni a. Project-in a huam chinah khawchhung tihchangtlun leh cheibawl hna pawh kalpui tel a ni bawk a. Line Department dangte pawhin a tul angin hma an la zel dawn a, phul hmun bakah avela thing leh nungchate tha taka humhalh a ni bawk.

Zopui Phul Samthang Nature Park hi hawna tlawh theiha peihfel ni tawh mah se, project kaltlang hian hmasawnna ruhrel dangte pawh a tul ang zela thawh chhunzawm tum a ni.

Vawiin Zopui Phul Samthang Nature Park hawnna hunah hian sawrkar department hotute, NGO hruaitute, Samthang khawtlang leh Welfare hruaitute bakah sawm bikte an tel a ni.