1258/2023-2024

Champhai, the 25th July, 2023: Champhai District Bharat Scouts & Guides Executive Meeting chu vawiin chawhnu dar 2 khan District President Pu James Lalrinchhana, District Bawrhsap hovin Education Training Hall, DEO Office-ah neih a ni a; he hunah hian Commissioner tharte lawmluhna Investiture Ceremony neih a ni bawk.

Bharat Scouts & Guides Champhai District President Pu James Lalrinchhana chuan Scouts & Guides member-te lawmna thu sawiin, tun hma atanga vawiin thlenga Champhai District-a Scouts & Guides khaidingtute chhuanawm a tih thu a sawi a. Zirna hmanga mi tha leh fel, ram leh hnam tana chhawrnahawm chher chhuah kawngah leh, khawtlanga harsatna awmte buaipui kawngah Scouts & Guides inzirtirnain awmze thui tak a neih thu a sawi a. Member thar lawmluhte chu thutiam an lakte tha taka chhawmnunga, Scouts & Guides movement-a theihtawp chhuaha tel tur leh thil tha ti tura inpekna tak tak thinlung pu turin a fuih a. Scouts & Guides inthuamnate ngai pawimawh tur leh chhuang taka ha thin turin a chah bawk.

Bharat Scouts & Guides Champhai District President chuan sawi chhunzawmin, hripui leng avangin hun engemawchen Scouts & Guides movement a khaihlak phah thu leh hmasawnna kawngah nghawng nasa tak a neih tel thu a sawi a. Champhai District-ah tuaithar leh tum a nih thu sawiin, vawiin hi a bultanna a ni, a ti a. Member tawn hriat ngah tak tak Champhai District-in a nei chu lawmawm tiin phurna nasa tak a pek thu a sawi a. Khawvel huap movement ropui tak a nih thu sawiin, thil tum ropui tak tak a nei a, midangte tan malsawmna ni tura inthununna tha, rinawmna, taimakna, kawm nuam leh nelawm, hun hmanthat, zahawmna chawinungtu leh mamawh huna fim taka che chhuak thei tura inpuahchahte chu a kentel pawimawh tak a ni, a ti bawk.

Bharat Scouts & Guides District Chief Commissioner Pu C.Lalbiakzauva, DEO & DPC, Samagra Shiksha, Champhai District chuan Champhai District-a zirna in 6 ah Scouts & Guides Unit din a nih mek bakah basic course training zo tawh Unit la din lo School 12 an awm thu a sawi a. School Education Department-in Scouts & Guides movement a ngai pawimawh a, zirna inahte din chhoh zel tum a ni, a ti bawk.

He hunah hian State Secretary Pu Lalngilneia Colney-in program neih a nih chhan leh khawvel puma Scouts & Guides hmalaknate a sawifiah a. Scouts & Guides Commissioner tharte lawmluhna Investiture Ceremony hman niin, Scouts 6 leh Guides 3 te thutiam laktirin Commissioner atan lawmluh an ni a. Member-te atangin tawnhriatte ngaihthlak a ni bawk a. District Secretary Pu Benjamin Zalawma Ralte, DSYO Champhaiin lawmthu sawiin hun hman a khar a ni.

Rorel inkhawm neih zui niin, thukhawm chuan Tritiya Sopan Testing Camp neih ni se an ti a. Basic course training zo tawh bakah zirna in Scouts & Guides Unit din lohnaahte District Chief Commissioner kaihhruaiin August ni 15 hmaa Unit din thuai a nih theih nan tanlak ni se an ti a. Heng bakah hian Champhai District Bharat Scouts & Guides kaltlanga hmalak dan tur pawimawh leh tul dangte rel a ni bawk.