Vawiin khan DC Conference Hall, Keifangtlang ah Champhai District Chapchar kut celebration committee chu champhai a chapchar kut 2017 hman dan tur ngaihtuahin Addl DC Pu C.Lalzarliana kaihhruaina hnuaiah an thukhawm.
Meeting ah hian thu pawimawh hrang hrang sawiho niin, chapchar kut 2017 chu March ni 3, 2017 chawhma Dar 10:30, kahrawt Field ah lawm nise tia rel ani a, kut Pa atan Pu Lalrinliana Sailo, MLA beisei ani a, kut thlengtu atan Champhai Bawrhsap Pu Vanlalngaihsaka, IAS chu beisei ani bawk.
Kutah hian mizo hnam lam chi hrang hrang thlirho theih tura beisei niin, chawnghnawh leh chai te nen hlim taka hun hman tura rel ani a, hemi bakah hian zaipawl leh malzai ngaihthlak tur awm tura rel ani. Sawrkar hnathawkte leh mipuite chu tam thei ang berin kut chhim tura ngen leh hriattir nise tiin meeting chuan a rel bawk ani.
Meeting chuan March ni 1 leh ni 2 chu Sawrkar hnathawk leh zirlai te chu hnathawhna hmun leh zirna inah tam thei ang berin a mizo silhfen inbel tura ngen leh hriattir nise tiin thu a titlu a. Chapchar kut 2017 lawmna leh huaihawtna chu sub-hqrs YMA, Champhai kutah dah tura rel ani a kumin chapchar kut thupui a tana thlan “ Ai a Upa Zah” tih chu meeting chuan tha tiin mizo khawtlang nun, a bik takin thangtharte ah uar leh zau zawka inzirtir tha a tih thu a tarlang bawk ani.
Chapchar Kut Celebration Committee ah hian Sawrkar Official hrang hrang, NGOs YMA, MUP, MHIP leh pawl hrang hrang aiawh te an tel ani.
