Vawiin (22.2.2017) khan State Institute of Rural Development & Panchayati Raj (SIRD&PR), Mizoram, Durtlang Leitan buatsaih “Training on Gram Panchayat Development Plan for Village Councils of Darlawn RD Block", ni thum chhung awh tur chu SIRD&PR Conference Hall-ah Pi Maria C.T. Zuali, Director, SIRD&PR chuan a hawng.
SIRD&PR Director chuan ram changkang tur chuan rualkhai taka khawpui leh thingtlang khua ten a ruala hma an sawn kawp a tul thu sawiin, chumi atan chuan khawtlang hruaitu Village Council-te pawimawh thu a sawi a. Training chhung hian VC-te chuan hmasawnna kawng zawh theih nana ruahmanna (Plan) siam dan te an zir tur thu sawiin, heng ruahmanna te a hlawhltin theih nana pawimawh tak hmathlir tha neih a, ngaihtuahnate tihhmasawn hmasak a ngaih tel thu a sawi a ni.
Pi Maria C.T. Zuali chuan Scheme leh Department hrang hrang atangin sum tlem tham te te kan hmuh thin te tangkai taka kan hman thiam a pawimawh a, a thlawna sawrkar atanga dawn tum ringawt lovin hmasawnna hna thawh nana kan sum dawnte a tlem tham thin avangin Village Council-te leh mipui, a neitute hian thawh tur tam tak kan nei a ni tih kan inhre reng tur a ni, a ti bawk a. Training chuan khaw tana danglamna a thlen ngei theih nan Darlawn RD Block huamchhunga khaw hrang hrang atanga Village Council Member kalkhawmte chu hmang tangkai ngei turin a sawm a ni.
He Training hawnna hun hi Pu Lalchhandama Lailung, Core Faculty (IT) chuan a kaihruai a, Pu Khawlsiamthanga Khawlhring, Deputy Director, SIRD&PR, Mizoram pawhin thu a sawi bawk. Training chhung hian SIRD&PR mithiamte’n zirtirna hi an pe thin dawn a ni.
