Vawiin khan Chief Minister Pu Lal Thanhawla’n Mizoram Cooperative Apex Bank New Secretariat Branch Building a hawng. Hawnna inkhawm hi Home Minister Pu R.Lalzirliana, Finance Minister Pu Lalsawta, Fisheries Minister Dr. B.D Chakma leh Parliamentary Secretary Pu Hmingdailova Khiangte ten an hmanpui a ni.

Chief Minister chuan Apex Bank an thangduang hle chu lawmawm a tih thu sawiin sawrkar hmun laili ber New Secretariat Complex chhungah branch an nei thei chu a lawmpui thu a sawi a. Co-operative Bank te hi India Economy ah an pawimawh bakah rural financing atan an tangkai bikin, NLUP leh NEDP kalpuina ah pawh rural financing hi a pawimawh hle thu leh hemi kawngah hian Apex Bank nena tha taka thawhho zel a beisei thu Pu Lal Thanhawla chuan a sawi bawk a . Chief Minister chuan sawrkar laipuiin tuna Direct Benefit Transfer leh Cashless Transaction a tih te hi uar lehzuala kalpui mek a nih thu leh hemi kawngah pawh hian Mizoram Cooperative Apex Bank hian theihtawp an chhuah zel a beisei thu a sawi a. Khawpui leh thingtlangah te Internet Connectivity a that chhoh zel nan hmalak mek anih thu leh Cashless Transaction kan neih ve thuai a beisei thu Chief Minister hian sawiin Bank hman tam hi changkanna kawng pakhat anih thu leh tun aia uar lehzuala Bank hmang zel turin mipuite a chah. Pu Lal Thanhawla chuan mahni hna theuhah rinawmna, taimakna leh thahnemngaihna nen thawk turin kalkhawmte a fuih a , Bank –a thawkte chu an customer- te hawihhawm taka lo buaipuia tha taka lo enkawl turin a chah bawk a ni.

Mizoram Cooperative Apex Bank New Secretariat Branch Building hi chhawng li niin, kawng an ah hian Apex Bank Branch leh ATM a awm a. Kawng hnuaiah hian chhawng hnih sawrkar VIP Parking siam a ni a, a chhawng chung ber hi SAD Security Office atan ruahman a ni. He building hi cheng nuai 296.82 senga North Eastern Consultancy Services sak niin a sak man hi Mizoram Cooperative Apex Bank in a tum a ni.

Mizoram Cooperative Apex Bank (MCAB) New Secretariat Branch hawnna hi MCAB Chairman Pi T. Lalmuanpuii’n a kaihruai a, NECS Chief Managing Director in Building thar chungchang Technical report a pe bawk a ni.