Vawiin hian Serchhip Bawrhsap Pisaah Deendayal Antyodaya Yojana-National Urban Livelihoods Mission (DAY-NULM), Serchhip District Executive Committee te chu an Chairman Dr. Lalrozama, IAS, Serchhip Bawrhsap ni bawk hovin an thu khawm a, District chhunga hmalak dan tur hrang hrang an rel

Dr. Lalrozama chuan, sawrkar in khua leh tui te a ngaihsak em em a, kawng hrang hrangin mi harsa leh chenna in neilote khai chhuah tumin a bei reng a ni. Tun ah pawh khawpuia mi harsate dapchhuah a, thiamna leh theihna neih tira mahnia ding thei tura tuamhlawm te, chenna in neilote pawh chenna in an neih theih nana ruahmanna siam sakte a tum mek a. Serchhip District ah pawh chutiang hmalakna chu DAY-NULM hmangin kalpui mek a ni a ti. He hmalakna hi State Level Executive Committee chuan Mizorama khua (Town) 7 ah hma thar a la leh dawn a, chung zingah chuan kan District chhunga mi Thenzawl pawh a rawn tel a ni, a ti. A mamawh dik takte dap chhuaha, tangkai taka he ruahmanna kalpui ngei a nih theih nan theihtawp chhuah a pawimawh thu member kal khawmte hmaah a tarlang a ni.

Vawiina Serchhip District Executive Committee thukhawm te hian State Level in Thenzawla hmalak thar a tumna chu lawmawm an ti hle a, a tha thei ang bera hnathawh zui a nih theih nan District Level ah theihtawpa bawhzui nise tiin a rel a ni. Hengte bakah hian Urban Homeless Survey a rang lama neih dan turte, Thenzawla Beneficiary Survey leh training kalpui thuai a nih theih dan turte an sawi hova, heng hmalak bul tanna kawng hrang hrangah hian a tul anga tlawmngaipawlte pawh thawhpuiah sawm nise tiin an rel a ni.

Hengte bakah hian hmalak mekna hrang hrang, Shalom Special School tana ruahmanna siamte, Quarry Road Venga Urban Homeless Shelter sakna tura ruahmanna kal mekte, Street Vending hote tanpuina tur ruahmanna te leh hmalakna kal mek dangte an thlir ho bawk.

He meeting ah hian DAY-NULM City Manager leh District Executive Committee Secretary ni bawk, Grace Lalrinfeli lehDistrict Executive Committee member dang te an tel a ni.