Vawiin chawhma khan Lunglei DC Conference Hall-ah Lunglei District Development Coordination and Monitoring Committee (DISHA) chu an Chairman Pu C.L. Ruakla, MP Lok Sabha leh Co-Chairman Pu Ronald Sapa Tlau, MP Rajya Sabha hovin an thukhawm a. October leh December 2016 chhunga Lunglei District-a hmasawnna hnathawh thlirhona an nei.

Pu C.L. Ruala chuan kan ram hmasawnna atan sawrkarin hmanrua dang a nei vaklo a, theihtawp kan chhuah chuan kan ram hmasawnna hi tluang takin a kal thei dawn a ni, a ti a. Thawhhona tha neih a pawimawh thu sawiin, tlawngaipawl aiawh lokal te pawh sawisel hreh nei miahlo turin a chah a ni. Pu Ronald Sapa Tlau pawhin kan ram siam tha tur hian midang an awm reng reng lova, a mipui neitu te pawh kan awlthawng bik theilo a ni, a ti a. Member-te mahni chanvo theuh duhthawh taka thahnemngaihna nena thawk turin a chah nghal a ni.

Meeting-ah hian October ni 18, 2016-a DISHA thurel bawhzui dan thlirho a ni a, hei bakah hian department hrang hrang te hmasawnna hnathawh tarlan a ni. NREGS hnuaiah kum 2016-17 chhungin ni 15 inhlawhna siam niin, ni 4 dang inhlawhna tur BDO-te hnenah pek a nih tawh thu tarlan a ni a. Pradhan Mantri Krishi Sinchayee Yojana (WD) hnuaiah Project 15 awm in, cheng nuai 1083.2 dawn atanga cheng nuai 1063.4 chu hnathawh nan hman tawh a ni. Pradhan Mantri Awas Yojana (Gramin) hnuaiah chhungkaw 708-te thlan chhuah tawh ni mahse, fund dawn a la nih loh avangin hna tan a la nilo a ni. Bunghmun, Lungsen leh Hnahthial BDO-ten Border Area Development Programme (BADP) hnuaia an hmalakna te an tarlang bawk a ni.

Pradhan Mantri Gram Sadak Yojana (PMGSY) hnuaiah kawng 5, km 51.394-a thui thawh mek a ni a. Mimal inthiarna (Individual Household Latrine) 138 Swachh Bharat Mission (Gramin) kaltlanga sak niin; Marpara, Rangte leh Lungchem Water Supply Scheme te National Rural Drinking Water Programme (NRDWP) hnuaia zawh tawh an ni. Deendayal Upadhyaya Gram Jyoti Yojana (DDUGJY) hnuaia hna erawh thawh tan theih a la nilo.

October-December 2016 chhung khan nausen pianghlim thi 19 an awm a, Infant Mortality Rate chu 31 a ni. Hemi hun chhung hian nu nau chunga thihna 1 a thleng bawk a ni. Child Development Project Officer ten block tinah (4) ICDS Project an enkawl a. Midday Meal Scheme kaltlangin Kitchen-cum-Store 30 sak belh tura ruahmanna kalpui mek a ni.

Pradhan Mantri Awas Yojana (Urban) hnuaia District Screening Committee-in beneficiary a thlan chhuah te list chu bank lama thawn a nih thu tarlan a ni a. Swachh Bharat Mission (Urban) hnuaiah Lunglei khawpui chu Open Defecation Free (ODF)-a puan niin, Hnahthial leh Tlabung te pawh puang thuai tura hmalak mek a ni. Lunglei District-ah Pradhan Mantri Fasal Bima Yojana (PMFSY) pawh kalpui thuai beisei a ni.

Meeting-ah hian sawrkar laipui scheme te tihlawhtling tura internet connectivity tha neih a pawimawh zia sawiho a ni a, bank tlem avanga harsatna hrang hrang awm te sawiho a ni bawk. Lung­lei district atangin MLA Pu Nihar Kanti Chakma a tel a, department official te bakah tlawmngaipawl aiawhte an tel a ni.