Vawiin chawhma khan Chief Secretary's Conference Room, New Secretariat ah Chief Secretary Pu Lalmalsawma hovin State Level Committee for Standardization & Quality Systems an thukhawm a. Mizoram chhunga bungraw lakluh leh mipui hman tura thilsiam ten - thatawk tura BIS in ruahmanna a siam, ISI chhinchhiahna chuang pha an ni em tih leh mipuiin an thil/bungraw lei chungchangah an chanvo an hriat theihna tura hmalak dan tur te sawi ho a ni.

Meeting kaihruaitu, Chief Secretary Pu Lalmalsawma chuan Bureau of Indian Standards Body(BIS) leh Mizoram sawrkar official te chu bungraw tha leh rintlak a awm theihna turin leh state chhunga eitur siamchhuah sawngbawl dan te chu a thianghlim tawk em tih te, state pawn atanga eitur lakluh te a him tawk em tih te mipui vantlangin an lo hriat chian zawk nan uar zawka zirtirna kalpuiin thawkdun se tha a tih thu a sawi a. Mipui hnena BIS chhinchhiahna awmzia leh a pawimawhna te zirtir kawngah tlawmngai pawlte thawhpui dan kawng te pawh zawng turin BIS hotute chu a sawm a ni.

Bureau Of Standards (BIS), India ram National Standards Body tia hriatlar hi ramchhunga kawng hrang hranga thilsiamchhuah leh hnathawh dan tur dinhmun leh tehfung(standard ) ruahmantu ber a ni a. ISI, ISO, ECO, etc chhinchhiahna hrang hrang, BIS in a pek te pawh hi a rinhlelhawm emaw duhthu a sam lo a nih chuan BIS office hnaibera Public Grievance Officer hnenah chiang taka chhan leh vang tarlangin sawisel theih a ni a. Lungawihlohna thlen te chu rang taka bawhzui zel a ni tih BIS hotute chuan an tarlang a ni.

BIS aiawh hian Pu Bishnu Gupta, DDG, BIS, Kolkata, Pu K.C. Santra, Scientist F & Head, BIS, Guwahati leh official thenkhat an rawn tel a. Mizoram chhunga an hmalakna leh a thil hmuh te tarlangin nasa zawk hmalak an tum thu an sawi a. Mizoram ah BIS hmalakna chak zawk nan leh Mizoram mipui ten an sum hmanral phu bungraw tha an lei theih nan zirtirna chak zawka kalpui a tul tih an sawi a. He hna thawktur hian Mizo tawng thiam BIS in a mamawh thu leh BIS hnuaia hnathawhtur chungchang te chu National Newspaper-ah leh BIS website ah te tarlan anih thin thu an sawi a. Mizoram chhunga indiustries hrang hrang an enchian hna an kalpui zel tur thu sawiin enchian tawh zingah tui in tur thianghlim(package drinking water) a tel tih an sawi a. Tun dinhmunah Koinonia Water Plant, Aizawl tih loh chu tuithianghlim bottle-a zuarchhuak zingah ISI mark nei thei tura enchianna paltlang a la awm lo tih an tarlang.