Vawiin khan Chief Minister Pu Lal Thanhawla chu a chenna in CM Bangla ah Counter Insurgency and Jungle Warfare School Vairengte hotupa, Commandant, Maj. Gen. M.S. Ghura chuan hmuin CIJW chu Indian Army hmun chhuanvawr anih thu a sawi.

Chief Minister Pu Lal Thanhawla chuan CIJWS chu Mizoram Sawrkar leh mipui ten hun rei tak atangin an hmelhriat tawh thu sawiin rambuai hmain Mizote chu sipaiah kan tam a officer pawh thahnem tak kan nei a, mahse rambuai leh an boruak tawn te avangin thalai te rilruah sipai laka rilru helna apiang a mahse remna leh muanna kan neih hnuin thalai te rilru pawh a tha lamin a inthlak chho a, tunah chuan Mizo thalai sang tam tak chu Indian Army ah awmin ram tana venhima hna thahnemngai takin an thawk mek a ni, a ti.

Chief Minister leh Maj. Gen Ghura chuan Myanmar ramah China hmalak dante sawiin an luh thuk zel chuan nakinah India tan harsatna an thlen thei thute an sawi dun a. Chief Minister chuan Myanmar nen inlaichin sawhnghet turin Mizoram sawrkarin theihtawp a chhuah thu a hrilh a. Chief Minister chuan CIJW leh Vairengte mipui inkarah boruak tha tak a awm zel chu lawmawm tiin kawng hrang hranga khawtlang an puihnaah lawmthu a sawi a. Gen. Ghura chuan an sikul, de-addiction centre leh an damdawi in te chu khawtlangin an hman tangkai thu a hrilh a, mipui leh CIJW inkara inunauna leh inlaichinna tha a awm zel nan theihtawp a chhuah tur thu a hrilh bawk. Gen. Ghura chuan CIJWS hmunhma zauhna atana ram an lak tur chu a fel tep tawh thusawiin he ram hi tihfel anih loh vangin helai hmuna Training Centre changkang tak a sak tur chu a khawtlai a, hun hmasa lamah Assam Sawrkar chuan CIJWS atan an duh zat ram an pek theih thu an dawng tawh a, mahse Mizoram hi an chhuahsan loh tur thu a sawi.

Counter Insurgency and Jungle Warfare hi Indian Army hnuaia Category A establishment a ni a, hel leh ramhnuaia ral te dona kawnga inzirtirna hmunpui pawimawh tak a ni a. Kum 2001 atang khan khawvel ram hrang hrang sipai te tan he School ah an training theihna tur ruahman a ni a, United States, United Kingdom, Russia, France, Israel, Africa ram thenkhatte leh ram dang bakah ram thenawm Nepal, Bangladesh leh Bhutan pawhin an sipaite helai hmunah training turin an tir tawh a ni; ram 41 sipai te hian CIJWS ah an training tawh a, tunah hian Egypt leh Afghanistan sipai te training an nei mek a ni.

CIJWS hi kum 1967 khan Meghlalaya-a Jaintia Hills-a Mynkre khuaah bultan niin khatih hunlaia Eastern Army Command-a General Officer Commanding-in-Chief (GOC-IN-C) leh a hnua Field Marshal hmasa ber nita Gen. Sam Manekshaw ngaihtuah chhuah a ni. Kum 1970 khan Vairengte ah suan choh niin tunah an awmna hmunah hian an insawhnghet ta a ni.

Attachment

  • Loading attachment...