Vawiin khan District Election Office Champhai buatsaihin kumin inthlan vuakveta Model Code of Conduct (MCC) kenkawh chungchang leh sum hman dan leh chet vel dan endika viltutur team te pualin DC Conference Hall-ah  Training  neih a ni. Training-ah hian Assembly Constituency 5 atanga Flying Squad Team (FST), Static Surveillance Team (SST), Video Surveillance Team (VST), Video Viewing Team (VVT) leh Accounting Team (AT)  member-te an kalkhawm a ni.

Vawiin Training-ah hian Pi Ethel Rothangpuii, PD DRDA-in Election Expenditure Monitoring (EEM) nihphung leh hnathawhte, Expenditure Observer awmzia leh hnathawh dan tlangpuite a sawi a. Dr Lallawmkima, DIPRO Champhaiin Media Certification and Monitoring Committee (MCMC) nihphung leh hnathawhte a sawifiah a. Pi Esther Leihang, SDC-in Assistant Expenditure Observer hnathawh leh Daily Report a sawizau a. Pi ST Lalvensangi, SDO (C)/BDO Khawzawl hnen atangin FST,SST,VST,VVT hnathawh leh report siam dante ngaihthlak a ni a. Pu Alan Lalthanzara, EO Champhaiin Candidate leh Party-te Campaign senso vil dan leh Control Room & Call Centre hnathawh a sawifiah bawk a ni.

Ruahman dan chuan Assembly Constituency bial tinah Flying Squad pahnih leh Static Surveillance Squad pahnih zel an awm dawn a. Flying Squad leh Static Surveillance Team tinah hian Magistrate 1, Videographer 1 leh Security Personnel-te an  awm dawn a, an ni hian Model Code of Conduct bawhchhiatna, sum hman leh chet vel dan vilin dan in a phal loh anga ti an awm emaw report an dawng anih chuan finfiahna mumal tak telin Election thuneitute hnenah ziakin an thlen zel anga, a tul anga hremna lek kawh a ni dawn a ni.

Video Surveillance Team hi Assembly Constituency tinah pakhat theuh an awm ang a, Magistrate leh Videographer awmin Political programme hrang hrangte programme leh thiltih thla an la thin dawn a. Video Viewing Team pawh Assembly Constituency tinah pakhat theuh awmin   Video thlalak lolut te chu lo endikin senso leh thildangte an hmuh dan Accounting Team-ah an thlen thin dawn a ni. Assembly Constituency tina Accounting Team chuan Candidate/ Party sum hman leh senso awm thei ang angte rate chart zulzuiin Shadow Observation Register (SOR) leh Folder of Evidence ah te an lo ziaklut zel dawn a ni.

Vawiin training kalte tan hian a hmunah Election Duty Certificate (EDC) leh Postal Ballot dilna siam nghal a ni a, inthlan ni a mahni Polling Station a Vote thlak hman lote tan hemi hmang hian vote a thlak theih dawn a ni.