No.7432/2020-2021

Champhai District Consultative Committee (DCC)/ District Level Review Committee (DLRC) chu an Chairman  Pi Maria C.T. Zuali, Champhai DC hovin vawiin khan DC Conference Hall-ah an thukhawma, September 2020 Quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna an thlirhoa, NABARD buatsaih Champhai District tana Potential Credit Linked Plan (PLP) 2021-2022 chu Bawrhsap Pi Maria C.T. Zuali’n a tlangzarh a ni. 

Pi Maria C.T. Zuali chuan  chuan mitinte banphaka Banking facilities chhawp a tul thu sawiin, Bank kaltanga hamthatna awmte a dawng tur te’n an dawn ngei theihna turin zau zawka inzirtirna  kalpui a tul takzet a ni, a ti  a. Mipui te’n Bank chhawr tangkai dan an thiam theihna tur leh Bank kaltlanga hamthatna awm theite an hriatfiah lehzual theihna turin lehkha pawimawh leh dilna form-te Mizo tawnga lehlin  chhawpchhuahsak tum turin Bank hotute a chah a. Mirethei leh dawmkan ngai te’n  hamthatna awm theite an dawn nan leh an intundinna tura pui thin turin a chah bawk.  Bank-a sum dah luh leh pekchhuah khaikhinna Credit Deposit Ratio inthlau lutuk chu ngaihmawhawm a tih thu sawiin, Credit Deposit Ratio tha zawk nei thei tura  inhawng leh zual turin a chah a.  Loan puktute pawh loan rulh ngaipawimawh tura chahin, loan rul tha lote umzui kawngah DC Office chuan Banker-te a tawiawm tlat dawn thu a sawi bawk. 

He Meeting-ah hian Pu L.Lawmvela, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah kum kalta September 2020 Quarter tawp thlenga Champhai District chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni. 

Meeting-a tarlan anih danin September 2020 Quarter zawh thlenga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 44.71 % a ni a, June  Quarter tawpa  CD Ratio 42.43 % aiin 2.28 % in a punga,  hei hian CD Ratio bituk zat  60 % chu a phak lo a ni.  2020-2021 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai  8261.84  atangin cheng nuai  3174.32 (38.42 %)  tihhlawhtlin a ni a,  Non Priority Sector hnuaia target cheng nuai 1215 atangin cheng nuai 892.22 (73.43%) tihhlawhtlin a ni. Pradhan Mantri Mudra Yojana (PMMY) hnuaiah mi 134 (Sishu-20, Kishore-98, Tarun-12, Stand Up India-4) te hnenah loan cheng nuai 200.49 hu pekchhuah a ni a. Government Sponsored Schemes hnuaia hmalaknate thlirho a ni bawk a. PMEGP hnuaia target 111 atanga  21 (cheng nuai 43), DAY-NULM/MzSRLM hnuaia target 470   atanga  69 (cheng nuai 150) te,  DAY-NULM hnuaia target 85 atanga 19 (cheng nuai 29.60) leh PMAY/HFA hnuaia target 150 atanga 15 (cheng nuai 39) te tihhlawhtlin a ni.  

PM Kisan Beneficiaries 89 te hnena KCC Loan cheng nuai 75.70 leh Animal Husbandry hnuaiah mi 26 te hnenah KCC Loan cheng  nuai 30.14  pek a ni a. Priority Sector hnuaia Segment hrang hranga Non Performing Asset (NPA) tlingkhawm zat chu cheng nuai 1217.20, 7.07% niin, Non Priority Sector hnuaia NPA tlingkhawm zat chu cheng nuai 86.40, 2.25% a ni. Loan rulh that loh Bakijai Case 42,  cheng nuai 21.61 hu vel a awma, September Quarter chhung hian rulh a ni lo a ni. Thingtlang/Zokhaw mite tana Bank hman dan zirtirna Digital Financial Literacy Awareness Programme pawh Covid-19 vanga punkhawm khap leh harsatna dangte avangin neih a ni lo.

He hunah hian Financial Year 2021-2022  Annual Credit Plan Target leh PMEGP hnuaia Bank hrang hrangte  Annual Credit Plan Target chungchang sawiho nghal niin pawm a ni a. Kumin chhunga DCC thutkhawm neih hun turte ngaihtuah niin Social Security Scheme kaltlanga hamthatna mipuite’n an chhawr tangkai theihna turin zau zawka inhrilhhriatna neih nise tih a ni a. Heng bakah hian Currency remittance leh Bank security  chungchang sawiho anih bakah inkaihhruaina tha zawk awm theih dan turte sawiho niin, Bank tinte pawh chak zawka hma la a, quarter tawp ni atanga chhiara ni 15 chhunga data thehlut thin tura hriattir nawn leh an ni bawk. 

Tun dinhmunah hian Champhai District-ah Bank branch hrang hrang  15 awm mekin, Public Sector Bank  4, Private Sector Bank 4,  Regional Rural Bank  6  leh State Cooperative Bank 1 te an awm mek a.  ATM  9,  Business Correspondent  8, CSP 1 leh IPPB hnuaia Banking Touch Point 26 te an awm mek a. Financial Literacy Centre 2 (Lead Bank Office, SBI Sponsored leh  Champhai Financial Literacy Centre, MCAB Ltd.) te awm mek bawkin kumin kum tawp hian Financial Literacy Centre 5 dang hawn belh tum a ni bawk.