No.7431/2020-2021

Vawiin chawhnu dar 1:00 khan Lunglei District Fire Prevention Committee chu an Chairman Lunglei Addl DC Pu R. Vanrengpuia hovin Lunglei DC Conference Hall an meeting.

Meeting chuan Fire Prevention Week puala Lunglei District-a hmalakna tlangpui tur a duang a, February ni 8 chawhnu dar 1:00-ah Convention Centre-ah Week hawnna hun hman nise tih an rel a. Lunglei District chhunga Block leh Sub-Division-te chu Forest Department nen tangrualin he Hapta hi an theih anga lo hmang ve tura ngen ni se an ti a. Sawrkar thupek dinglai leh ram tikang lo tura invenna Dan “The Mizoram (Prevention and Control of Fire in the Village Ram), Rules 2001”chu Lunglei District mipuiten an zawm ngei theihnan VC, YMA leh kohhran hrang hrang te nen tangrualin hmalak tum a ni a, tlangua, banner, newspaper leh TV media-te kaltlangin mipui hnenahhemi chungchang zirtirna kalpui tum a ni. State Level Sub Committee chuan March ni 15 hma in Lo/Leipui hal vek tur tih alo rel tawh chu Lunglei District chhunga Village Council zawng zawng tenzawm ngei turin DLAO nen tangkawpa hmalak ni se tih an rel bawk a. District Magistrate, Lunglei District chuan ram tih kan chungchangah Prohibitory Order a chhuah dawn bawk a ni. Kum danga lo tih thin tawh angin mipuite hnena ram kang ven lam zirtirna pe tha chanchinbu leh media dang hnenah lawmman pek ni se tih Committee chuan a rel bawk.

Mizoram sorkar chuan kum 1980 chho atang daih tawh khan ramkang ven kawngah mipuite hnena zirtirna pek (awareness campaign) te, Ramkang venna atana dan leh hrai tul ang duan leh thupek hrang hrangte chhuahin hma a lo la tawh thin a. Tin, sorkar thupek ang zelin zokhaw tam takah Ramkang Veng Committee-te dinin tlawmngai pawl hrang hrangte nen nasa takin tan lak ho a ni tawh thin. He hmalakna kal zelah kum 2000 khan State Level Fire Prevention Committee chu din a ni ta a, District tinah Deputy Commissioner-te kaihhruaina hnuaiah District Level Fire Prevention Committee din a ni bawk a. State Level Committee kutke ber ni turin Sub-Committee pawh din ani bawk. A din tirh kum, kum 2000 atang khan kum tin Fire Prevention Week, Ramkang Ven Hapta bik puangin he hapta hi hmalak tanna atana hman ziah thin a ni.