No.7430/2020-2021

Vawiin khan School Education Minister Pu Lalchhandama Ralte chuan a bial chhung khaw hrang hrang a fan kual meknaah Sawleng, Kepran,  E.Phaileng leh Pehlawn khua te a tlawh. Heng khaw hrang hrangah te hian sorkar sikul, sorkar hmunhma dangte leh hall te a tlawh kual a, khawtlangin harsatna an neih leh an mamawhte a hmunah a en dik a ni.

School Education Minister chuan amah lo dawngsawngtu khawtlang hruaitute chu sorkar hnathawh tawiawm zel turin a sawm a. Tun sorkar term kum 2 leh thla khat chhungin  Covid-19 avangin thla 11 inthlan avangin thla 4 hnathawk thei lovin an awm tih sawiin  Covid-19 avangin khawvel economy leh India economy a chhia a, MP fund pawh tih hniam vek a ni a. MLA fund pawh a awm thei rih lo tih sawiin central atangin sum a lo kal hlei thei rih lo a ti a. Fund lo kal chhun ang ang pawh hrileng do nan leh mipui mamawh zual atan hman a ngai a, thla tam tak hmasawnna hna a thawh theih loh a ti a. Hripui donaah India ram state-ah a titha ber kan ni a, hei hi sorkar, kohhran leh tlawmngai pawlte tanho vang a ni a ti bawk. Tunah erawhchuan hrileng pawhin ziaawm lam a pan chho zel a, sum leh pai dinhmun pawhin ziaawm lam a pan chhoh beisei a ni a,  hmasawnna hnathawh pawh a pangngaia a kal leh thuai beisei a ni tih sawiin mipuite thleng phak tam zawk hnathawh hi kan chàk tawh hle a ni a ti a. SEDP pawh sorkar sum a ziaawm ve leha kalpui turin sorkar a insangmar mek a ni a ti bawk.

Minister hian Govt. Nehru Memorial High School Kepran Golden Jubilee lungphun a hawng nghal a. Kalkhawmte hmaa thu a sawiah kan ram hmasawnna atan zirna hi a hnukpui a ni tih hria a, zirna hmun te duat turin a sawm a ni. NM High School Jubilee lawmpui nan hian cheng singkhat a hlan nghal a ni.

Tun tuma a bial fan dan chu mipui tibuai lo thei ang ber leh khawchhunga thawh ngai a hmuna ena hnathawh tur ruahman chu a tum a ni tih a sawi a, khawtlang hruaitute,  tlawmngai pawl hruaitute leh mimalte pawhin mamawh leh harsatna an neih ang angah bialtu anih anga a hriat ngai  chu hrilh thin turin a chah bawk a ni. 

Minister-in a bial khaw hrang hrang a tlawh kualnaah hian Sakawrdai Sub Division Official te, School Education Official te leh Khawtlang hruaitu ten an tawiawm a ni.