No.3700/2021-2022

Aizawl the 17thJanuary, 2022: Champhai District Consultative Committee (DCC)/ District Level Review Committee (DLRC) chu vawiin chawhma dar 11:00 khan Chairman Pi Maria C.T Zuali, Champhai DC hovin DC Conference Hall-ah an thukhawm. He hunah hian September 2021 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni. He hunah hian NABARD (National Bank for Agriculture and Rural Development), Champhai buatsaih Potential Linked Credit Plan 2022-2023 chu Bawrhsapin a tlangzarh nghal a ni.

He hun kaihruaitu Bawrhsap Pi Maria C.T Zuali chuan loneitu leh ran vulhtute hamthatna ngaihvena Bank thenkhat ten hma an la chu lawmawm a tih thu sawiin, kuthnathawktu leh loneitute chawikang tura theihtawp chhuah zel turin a fuih a. Line Department hrang hrang thawktute chu Bank leh loneitute inkara palai hna thawka suihzawmtu nih tum tur leh an hriat thiam loh awmte hrilh hria a, inhawng taka hmalakpuitu nih tum fo turin a chah a. Bank a pawisa dahluh emaw, Bank in pawisa a dawn tam ang hua loan pek chhuak kawnga a inhawng tawk lo chu veiawm a tih thu sawiin, hamthatna dawng thei turte hrilhhriat loh avanga loan pek chhuah thalo awm theite chu chingfela a tul anga bawhzui turin Bank thawktute leh Line Department hotute a chah a. Mirethei leh chawikan ngaite chawikan kawngah thahnem ngai taka thawk tur leh Financial Literacy Campaign tam zawk nei theuh turin Bank hrang hrang thawktute chu a chah a ni.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin September 2021 quarter chhunga Champhai District-a Bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio/CD Ratio chawhrual chu 48.36 % a ni a, June 2021 quarter tawpa CD Ratio 43.14 % aiin 5.22 % in a pung mahse hei hian CD Ratio bituk zat 60 % chu a phak lo a ni. 2021-2022 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 13010.70 atangin cheng nuai 7073.23 (54.36 %) hu tihhlawhtlin a ni a, Non Priority Sector hnuaia target cheng nuai 1364 atangin cheng nuai 1846.79 (135.40 %) hu tihhlawhtlin tawh a ni. Pradhan Mantri Mudra Yojana (PMMY) kaltlangin Sishu hnuaiah mi 3, Kishore hnuaiah mi 67, Tarun hnuaiah mi 23, Stand up India hnuaiah mi 5, an vaiin mi 98 te hnenah loan cheng nuai 266.28 hu pek chhuah a ni tawh bawk.

Nikum September quarter tawp thleng khan Social Security Scheme Pradhan Mantri Jan Dhan Yojana (PMJDY) hnuaiah mi 22668 inziaklutin, Pradhan Mantri Jeevan Jyoti Bima Yojana (PMJJBY) hnuaiah mi 9766, Pradhan Mantri Suraksha Bima Yojana(PMSBY) hnuaiah mi 15572 leh Atal Pension Yojana (APY) hnuaiah mi 590 te an inziaklut a. September quarter chhung khan Priority Sector hnuaiah Non Performing Assets (NPA) cheng nuai 1281.74 (7.02%) leh Non Priority Sector hnuaiah NPA cheng nuai 71.26 (0.83%) awmin Bakijai case report a awm lo a ni. Thingtlang/zokhaw mite tana Bank hman dan inzirtirna Financial Literacy Campaign (FLC) tum 5 buatsaih niin mi 166 an tel a ni.

Heng bakah hian Currency remittance leh Bank leh ATM venhim chungchang sawiho a nih bakah pawisa lakchhuah theiha a awm reng theihna tura tanlakna turte sawiho a ni a. Bank tinte pawh chak zawka hma la a, quarter tawp ni atanga chhiara ni 15 chhunga data thehlut thin tura hriattir nawn leh an ni bawk.

September 2021 Quarter tawp thleng khan Champhai District-ah Bank branch hrang hrang 17 awm mekin, Public Sector Bank 5, Private Sector Bank 5, Regional Rural Bank 6 leh State Cooperative Bank 1 te an awm mek a ni. ATM 9, Business Correspondent 8, CSP 1 leh IPPB hnuaia Banking Touch Point 26 te an awm mek a. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te a awm mek a. RSETI (Rural Self Employment Training Institution) hranpa a awm loh avangin RSETI Aizawlin a vil mek a ni.