No.3701/2021-2022

Pawlkut thla ni 17, 2022: Vawiin khan Lawngtlai District Level Committee on Myanmar Refugees chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm.

Chairman Dr Andrew H. Vanlaldika chuan District Level Committee on Myanmar Refugees chu High Level Committee on Myanmar Refugees thu rel bawhzuia din a nih thu sawiin, thut khawm vawi khatnaa kal member-te lawmna thu a sawi a. Myanmar ram buaina avangin Lawngtlai District chhungah raltlan eng emaw zat an lo lut tawh tih sawiin, anmahni chhawmdawlna kawnga theih tawp chhuahtu Central Young Lai Association, kohhran, tlawmngai pawl leh District mipuite inpeknaah lawm thu a sawi a ni.

Task Group on Myanmar Refugees Nodal Officer, Lawngtlai Sub-Divisional Officer (Sadar) Pi TT Beikhaizi chuan Lawngtlai District chhunga Myanmar raltlante dinhmun tlangpui a tar lang a. Central YLA hruaitute hnen atangin raltlan an lo buaipui tawh dan ngaihthlak a ni bawk a. Lawngtlai District chhunga Myanmar atanga raltlan awm mekte leh lo la thlen belh turte chhawmdawl leh enkawl zui dan turte sawi ho zui a ni.

Thuneitute'n an chhinchhiah danin, tun dinhmunah Lawngtlai District chhungah Myanmar atanga raltlan lo lut mi 4,826 an awm mek a. An zinga mi 3,241 chu kum 12 chung lam niin, kum 12 hnuai lam mi 1,585 an awm a; hmeichhia 2,254 leh mipa 2,572 an ni. Raltlante chhawmdawl leh enkawlna atan hian an khawsakna tur hmun ngaihtuah belh chungchang te, an ei leh in tur leh damdawi chungchang te leh an mamawh tur hrang hrang phuhruk dan tur chu vawiin hian sawi ho a ni.