4567/2023-2024

Champhai, the 15th April, 2024: Champhai District huamchhunga Cooperative Society-te hmasawnna tura thuneihna leh mawhphurna neitu sang, Champhai District Cooperative Development Committee (DCDC) chuan an Chairman Pu James Lalrinchhana, District Bawrhsap hovin tukin dar 7:00 khan Champhai District Milk Producers’ Co-operative Union Limited (CHAMUL), A.H & Vety. Complex, Champhai Vengsang hmunhma leh hmanraw neihte tlawhin an enfiah.

He hunah hian chhan hrang hrang avanga hun rei tawh tak chawlhsan tawh Champhai District Milk Producers’ Co-operative Union Limited (CHAMUL) hmunhma, building leh a chhunga bungrua awmte chu District Cooperative Development Committee thutkhawmin a lo rel tawh bawhzuiin hawna enfiah a ni a. A hmunhma leh bungraw awm ang angte chu tihfai thuai ni se, electric pawhluhna, line hrang hrang inthlunzawm dan leh bawnghnute sawngbawlna khawl dinhmunte chu mithiam zawkte ruaia enfiah thuaia enchhinna neih ni se an ti a. Endikna atanga a dinhmun dik tak hmuhchhuah azirin hmalak chhunzawm lehzel dan tur ngaihtuahho leh nise an ti bawk.

CHAMUL hian kum 2010-2011 atang khan Primary Cooperative Society member-te hnen atangin Bawnghnute lakhawmin CHAMUL Bawnghnute a siam chhuak tan a. Society member atanga Bawnghnute a leikhawm chu hralh chhawn leh turin a siam chhuak a, Champhai leh khaw chhehvelahte an hralh thin a ni. January ni 23, 2014 ah Pasteuriser leh Packing machine a chhiat avangin kum khat chuang chawlh lailawk a ni a. Kum 2015 November thla atangin lakkhawm leh a ni a, kum 2017 kum tirah harsatna/buaina a awm avangin tun thlengin Bawnghnute lakkhawm a ni ta lo a ni.