4568/2023-2024

2024 Ṭau thla ni 15: Lok Sabha Inthlanpui, 2024-a Lawngtlai District chhunga assembly bial pathuma inthlan nana Electronic Voting Machine (EVM) leh Voter Verifiable Paper Audit Trail (VVPAT) hman tura ruahman fel sa baka thlaveng (reserve) atana EVM leh VVPAT mamawh tur belhna (supplementary) chu vawiin khan randomisation leh commissioning te tih niin, hman theih tura buatsaih fel a ni.

First level checking (FLC) endikna pal tlang tawh EVM control unit 26, ballot unit 25 leh VVPAT 31 te chu a hmanna tur assembly constituency tihfel nan DC Office Chamber-ah political party ai awhte hriatpuinain 1st randomisation tih hmasak niin, EVM leh VVPAT inkawp tur thliar fel nan RO office Aizawl aṭangin 2nd randomisation tih zui a ni a. Randomisation hmanga thliar fel tawh sa EVM leh VVPAT te hi Government Lawngtlai College-ah commissioning tih chhunzawm niin, EVM engineer-te'n hman theih turin an buatsaih zui nghal a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.

EVM leh VVPAT belhna (supplementary)-te hi bial hrang hranga mamawh thulha hman tur thlaveng (reserve) atana tih a ni a. Kumin Lok Sabha Inthlanpui atan hian 36-Tuichawng bialah EVM/VVPAT set 70, 37-Lawngtlai West bialah EVM/VVPAT set 69 leh 38-Lawngtlai East bialah EVM/VVPAT set 42 hman a ni dawn a. EVM leh VVPAT hman tur bakah thlaveng (reserve) tur eng emaw zat chu buatsaih fel a, dah hran vek tawh a ni a. Eng emaw thulha harsatna a awm loh nan reserve tur hi ruahman belh leh a ni.

Attachment

  • Loading attachment...