4569/2023-2024

2024 Ṭau thla ni 15: Lok Sabha Inthlanpui 2024 lo awm tura Lawngtlai District chhunga inthlan buaipuitu tur polling party-te tirh chhuah leh dawnsawnnaa mawh phur tura ruat, Dispatch & Receiving Team te tan vawiin khan Lawngtlai DC Conference Hall-ah training buatsaih a ni.

He hunah hian Lawngtlai Sub-Divisional Officer (Sadar) Pi Margaret J. Vanlalremmawii leh Sub-Deputy Commissioner Pu Samuel Lalmalsawma Sailo te'n training an pe a. Inthlan buatsaihna tura bungrua leh hmanraw mamawh hrang hrangte kim tak leh felfai taka pek chhuah a nih theih dan tur leh inthlan zawha khawl leh lehkha pawimawhte felfai taka lo dawnsawn dan tur zir ho a ni.

Lawngtlai District chhunga assembly bial pathumah hian Dispatch & Receiving Team panga leh EVM Transportation Team pakhat ṭheuh ruahman a ni a. April ni 17, 2024 (Nilaini) zing dar 6 aṭangin Government Lawngtlai College-ah polling party-te tirh chhuahna hi kalpui ṭan tura ruahman a ni a. April ni 17-ah hian polling party 116 tirh chhuah niin, April ni 18-ah polling party 65 tirh chhuah an ni ang a. April ni 19-a vote thlak zawh a nih veleh polling party-te'n Lawngtlai pan khawm nghalin, Government Lawngtlai College-ah lo dawnsawn an ni ang.

Attachment

  • Loading attachment...