3553/20023-2024

Champhai the 30th January, 2024 - Champhai District Disaster Management Authority Committee chu Nimin khan an Chairman Pu James Lalrinchhana kaihhruaiin DC Conference Hall, Keifangtlangah an thukhawm.

Pu James Lalrinchhana chuan District Disaster Management Authority chu Disaster Management Act. 2005, Sec. 25 hnuaia din a nih thu a tarlang a. Disaster kaihhnawihah Fire Department leh SYMA te thawhrimna thin chu fakawm a tih thu sawiin thal lo ni chho leh mek ah Fire Department te'n theihtawp mipuite tan chhuah leh turin a chah nghal bawk a ni. In sak vang emaw a vantlang kawng hnawhpin chu dan kalh a nih thu leh Assam Rifles te pawhin DDMA thu lo chuan an duh na hmun hmunah kawng an dang thiang lo tih tarlangin, engemaw zat chu an insawntir tawh thu a tarlang bawk.

He hunah hian In sa thar te chhiatrupna laka an him theihna tur kawng hrang hrang sawiho a ni a, DDMA chuan In sa tur reng reng in DDMA ah insak phal na dil hmasak a pawimawh thu leh chu chuan hun lo awm zel turah chhiatrup thlen thulh ah kawng tam takah a ven lawk thin thu tarlan a ni a, DDMA a insak phalna dilte hnenah lei laih ngai te chuan leivung an paihna tur hmun lo zawhchian thin ni se, tiin an rel a, in sa te reng reng in an hnawmhnawk leh kawng an tihbawlhhlawh thin te chu anmahni thenfai tur a ni tih mipuite'n an hriat a tul thu tarlan a ni a, remchang hmasa berah Road Protection Squad pawh tharthawh leh ngei nise an ti.

Thukhawm chuan tui tla awm palh a chhanchhuah hna thawk thei turin tui chhung lut thiam te thuam chak turin March thla chhungin Champhai ah ngei training buatsaih ni se an ti a, chhiatrupna thlen thulha hman tur hmanrua chi hrang hrang 29 DDMA in a dawn te tarlan niin heng an bungraw dawn thar te hi a theih ang ang semchhuak turin ruahmanna an siam a ni. Khawpui chhunga kangmei a chhuah thulha Fire Department te tui lakna tur Fire Hydrant 6 awm mek te chu a rang thei ang bera hman theih tura peih turin PHE Department in hma la se an ti a, hmanhmawh thilah Cluster atanga lak a nihin mimal hamthatna um a, anmahni tui point lo hawn chingte'n sim se an duh thu tarlang a ni bawk. Kangmei laka inven dan leh chhanchhuah hna thawh dan te a tam thei ang ber inzirtirna DDMA atangin buatsaih nise an ti bawk.

July ni 13, 2023 a lungrem tura lehkha pek tawh, Tiroma Filling Station te chuan tun thlenga an leivung tla venna tur lung an la rem loh chungchang ngaihtuah niin tun thlenga lung an la rem loh chhan sawifiah turin Tiroma Filling Station neitupa chu koh nise an ti a, lung hi an rem thei dawn lo a nih chuan a thlanga in awm te tan a hlauhawm bak avangin an hmunhma chu khar sak thlenga hmalak nise tiin thukhawm chuan a rel bawk.