945/2023-2024

Champhai, the 27th June, 2023: Vawiin chawhma dar 11:00 khan Champhai District Education Committee (DEC) meeting vawi 35-na chu DC Conference Hall, Champhaiah an Chairman Pu James Lalrinchhana, District Bawrhsapin hova neih a ni.

DEC Chairman Pu James Lalrinchhana chuan Champhai District chu District hlim leh dam a nih theih nan zirlaiteah nasa taka tanlak a tul thu sawiin, zirlaite hmakhua ngaia theihtawp chhuah turin member-te a ngen a. Champhai District chhungah hmasawnna ruhrel dangte hlamchhiah chuang lovin zirna, hriselna leh infiamna tih hmasawn kawnga tanlak a nih thu a sawi bawk.

He hunah hian Member Secretary Pu C.Lalbiakzauva, District Project Coordinator, Samagra Shiksha chuan hmalakna hrang hrang report a pe a. Meeting chuan Champhai District chhunga zirna inahte Scouts & Guides unit a tam thei ang ber din a nih theih nan chak zawka hma lak chhunzawm ni se a ti a. Grassroot Sports Development Programme hmalaknaa State level intihsiaknaa Champhai District-in Team Champion nihna dinhmun a hauh chu chhuanawm an ti a. High School leh Higher Secondary School zirlai naupangte tan Career Guidance, NEP 2020 anga University Course kalpui tur leh Common University Entrance Test (CUET) chungchangah Awareness Campaign neih ni se an ti bawk a. SDEO Office hmun hlui Urban Primary Health Centre atana hawh mek chungchang pawh ngaihtuahho a ni a. Vocational Education hnuaia zirlaite'n certificate an dawng tlai thin chu hma zawka an dawn theih nan a remchan dan anga hmalak ni se, an ti bawk.

District Education Committee thukhawm chuan Champhai District tana Project Approval Board-in kum 2023-2024 chhung atana hmalakna tur hrang hrang a pawmpuite an thlir hova, Elementary Education atan cheng nuai 1222.84, Secondary Education atan cheng nuai 1078.93 leh Teacher Education atan cheng nuai 178.89, a vaiin cheng nuai 2480.65 pawm a nih thu tarlan a ni.

Vawiin vek khan Champhai District chhunga Vocational Education Teacher (VE Teacher) te tan Education Training Hall-ah Training neih a ni a, VE Teacher 25 Training-ah hian an kal a ni. Training-ah hian hmalakna report zirtirtute'n an pe a. Pu Lalthanpuia, Associate Professor & HoD, Department of Computer Science, Govt. Champhai College chuan zirtirna a pe a; training chhimtute'n an hlawkpui hle a ni.