946/2023-2024

Aizawl 27^th June 2023: Mizo Hnam Sipaite (MNF Returnees) Maumual, Chaltlang rama chenna in ngaihsak tura din “Maumual Development Committee for MNF Returnees” chu an Chairman Pu Lalruatkima hovin a pisa ah vawiin khan thukhawmna an nei a, Maumual ram awmna bialtu MLA, Veterinary and Fishery Board Vice-Chairman ni bawk Pu C. Lalmuanpuia pawh thutkhawm ah hian a tel a ni.

Thutkhawm kaihruaitu Pu Lalruatkima chuan kum 1986-a India sawrkar leh Mizo National Front ten inremna thuthlung an ziah hnua hnam pasaltha rawn hawte pualin Maumual ram hi theh a nih thu a sawi a. A hmun hi khang hun lai kha chuan  hla deuh leh thlaler deuh anga a lan avangin chenna in sa duh pawh an awm mang lo niin a lang a, tunah erawh chuan chutiang a ni tawh lova, hmun tha leh rem tak a lo ni tawh a ti. Sawrkarin Ex-MNA te in leh lo ngaihtuahsak hi a ngaihpawimawh avangin theihtawp chhuahin hmalak reng a nih thu tarlangin House Site Plan kum 1987 a siam tawh chu uluk leh tunlai thiamna changkang zawk hmanga House Site Plan hi siam that a ni, a ti. Land Revenue & Settlement Department chuan surveyor tirin mumal taka survey neih vek tawhin, plot pawh siamfel anih thu sawiin  siamrem ngai la awm te pawh siamrem nghal zel tura hmalak a nih thu a tarlang.

Land Revenue & Settlement Minister chuan Maumual ram  theh chu phase hnih a kalpui anih thu tarlangin, Phase-I ah hian SEDP  atangin cheng 5,00,000 dah niin phase-II  kalpui thuai anih theih nan turin hmalak tan mek a ni, a ti. Pu Lalruatkima chuan Maumual ramah khawpui felfai tak din a ni dawn a, mimal ram bakah hian mipui vantlang hmunhma tur – Anganwadi, School, taxi stand leh a tul dangte awmin, in tin chu kawngpui tha takin a pawh vek dawn tih a sawi bawk.

Vawiin thukhawm hian Revenue Department in survey an neih atang a House Site Plan/Plot- an siamte an thlirho bawk a. Ruahmanna ang chuan July thla chhung ngei a engkim peihfel tum a ni.

Vawiin thutkhawm a report a nih danin Maumual ram chhunga ram nei in report zat hi mi 863- an ni a. Report lut atanga House-Site Plan chhunga awm tih hriat mai theih hi 452- awmin, Plan chhunga mi tih hriat mai theih loh 411- an awm mek a ni. Plot allotment siam zawng zawng chu 677- niin plot cancel leh a ram neitute kuta pek 61- a awm a ni.

Vawiin thutkhawm ah hian Land Revenue & settlement, PWD leh DM&R hotute bakah MNF Returnees- aiawh an tel bawk a ni.