947/2023-2024

2023 Nikir thla ni 27: Vawiin khan Lawngtlai District Level Committee for Implementation of National Social Assistance Programme (NSAP) chu Lawngtlai DC Conference Hall-ah Lawngtlai Sub-Divisional Officer (Sadar) Pu Daniel Sailo hovin an ṭhu khawm.

He hunah hian Member Secretary, District Social Welfare Officer Siaha Pi Gracy Lalchhanzuali chuan meeting koh chhan sawifiahin, NFBS scheme chungchang leh a dil dan kal hmang tlangpui a sawifiah a. Member kal khawmte chuan National Family Benefit Scheme (NFBS), 2022-2023 hnuaia Lawngtlai District aṭanga ṭanpuina dawng thei tur beneficiary 41 an thlang chhuak a ni.

NFBS hi chhungkuaa ei zawngtu ber an thih a, an kalsan chhungkuate ṭanpui nana pawisa fai ₹ 20,000/- pekna tura Sawrkar Laipui ruahmanna a ni a. NFBS dawng thei turin chhungkaw ei zawngtu boralte chu kum 18-59 inkar BPL, PHH leh APY chhungkua, ration card-a hming chuang, India khua leh tui dik tak an ni tur a ni a. Chhungkuaa ei zawngtu ber boral fate chu kum tling lo an ni tur a nih bakah, khawtlang pawhin he ṭanpuina hi dawng tlaka an ngaihte an ni tur a ni bawk.