944/2023-2024

Khawzawl, the 27th June, 2023: Vawiin chawhnu dar 1:00 khan Khawzawl Zaingen Branch YMA Hall-ah Mizo Zirlai Pawl Headquarters Khawzawl buatsaihin Khawzawl khaw chhunga HSLC leh HSSLC pass lawmpuina hun hman a ni a, he hun hi Deputy Chief Minister Pu Tawnluia, Tuichang AC bialtu MLA ni bawk chuan khuallian niin hun a hmanpui a. Khuallian hi Khawzawl District Bawrhsap Pu K.Lalrohlua, DEO Pu Lalsikula leh Official dangte'n an tawiawm a ni.

Khuallian Pu Tawnluia chuan HSLC leh HSSLC pass thar zawng zawngte a lawmpui thu sawiin, pass zo ve ta lote pawh beidawng mai lova theihtawp chhuah zel turin turin a fuih a. PES Khawzawl Vengthar leh Khawzawl Higher Secondary School Science stream-te'n 100% pass percentage an nei leh PES School zinga Khawzawl Vengthar PES School-in Mizorama a ti tha ber dinhmun an hauh thei chu bialtu MLA a nih anga a chhuan thu a sawi a. MZP buatsaih Inter Higher Secondary School Volleyball Tournament neih zawh takah Khawzawl Higher Secondary School (KHSS) Hmeichhe Team-te Mizorama Champion Team an ni chu a lawmpui thu a sawi bawk a, champion lawm nan KHSS School chu Table Tennis Board thar tha tak a pe a ni.

Pu Tawnluia chuan zirlaite chu mizo an nih avanga inchhuang tur leh kan pi leh pute'n mizo hnam a dinchhuah theihna atana tha an lo thawh tawhte, mizo hnam ziarang, tawng, lam leh incheinate ngaihlu thiam turtein a chah a. Hnamdangte nena kan inpawh lehzual theih nan khawvel pum huapa tawng hman tlanglawn ber global language English thiam tum tura fuihin, saptawng chu rual pawlna tura hmanraw pawimawh hmasa a nih angin nal taka thiam tum turin zirlaite a fuih a. Text book piah lamah kutthemthiamna nei tura zirlaite chahin, sawrkar hna kan inchan vek dawn loh avangin mahni kutkawiha eizawnna hna thawk thei tura ngaihtuahna seng thin turin a fuih bawk a. Tuichang bial chhunga hmasawnna ruhrel sawrkarin a din hrang hrang zinga infiamna lama infrastructure, Mualvawm Field Artificial turf phah te, Volleyball Grass Court siam te, Basketball Court leh thildang sawrkarin a siamtharte chu hman tangkai tum turin a fuih bawk a. Zirlaite chu khawvel hriata mizo hnam tungdingtu ni tura theihtawp chhuah turin a fuih bawk.

Programme uaptu MZP Gen. Hqrs. President Pu Lalnunmawia Pautu pawhin thu sawiin, MZP in kum 1995 atangin zirlai titha chawimawina an buatsaih thin thu a sawi a, chona thar leh inelna thianghlim zirlaite'n an neih theih nana buatsaih thin a ni, a ti a. Zirlai kalkhawmte chu ram leh hnam hmangaihna thinlung pu tlat thin turin a chah bawk.

HSLC & HSSLC pass lawmpuina hi Pu R.Malsawmkima, Vice President, MZP Hqrs. Khawzawlin a kaihruai a, MZP Hqrs Khawzawlin HSLC leh HSSLC pass thar an lawmpuite hi Khawzawl khaw chhung zirlaite an ni a, Khawzawl khaw chhung atanga HSLC pass tharte zingah Martin K.Lalruatsanga s/o K.Malsawmkima chuan mark hmu tam berin Gold Award hlan a ni a, Lalpekhlui d/o Lalfakzuala chuan mark hmu tam ber dawtin Silver Award hlan a ni a, pathumna chu R.Vanlalhruaia s/o Joseph Lalchhandama niin Bronze Award hlan a ni.

HSSLC bikah Gold Award Vanlalchhanchhuaha s/o Darhmingthanga hlan niin Silver Award chu PC Lianthangpuii s/o PC Liansangpuia hnenah hlan niin, Rebeck Vanlalthlani d/o K.Lalbiakhnuna hnenah Bronze Award hlan a ni bawk. Inter Higher Secondary School Volleyball Tournament-a Champion Team Khawzawl Higher Secondary School Hmeichhe Volleyball Team hnenah Special Award hlan a ni bawk a. Pass lawmpuina inkhawm hi Pu JH. Lalrinsanga Adviser, MZP Hqrs. Khawzawlin lawmthu sawiin a khar a ni.