943/2023-2024

Kolasib dated 27th June 2023: Remna Ni 2023 lawmna pualin Kolasibah ‘Zalenna leh Ralmuanna pho lang thei hlimthla’ tih thupui hmangin Deputy Commissioner’s Office, District Information & Public Relations Office leh ZOOM tangkawp chuan Photography Competition an buatsaih a. Mi 14 in thlalak thehlutin Mobile phone category-ah thlalak 20 leh Digital Camera category-ah thlalak 25 a lut a ni.

I&PR Conference Hall, Project veng, Kolasiba thlalak endiktuten thlalak theh luh te an endiknaah hian Pu John LT Sanga, Deputy Commissioner chuan thalaite thiamthil nei tha tak takte thiamna leh theihna haichhuah leh phochhuahna tur a Remna Ni 2023 pual a Painting, Photography, Essay leh Quiz-te buatsaih a nih thu a sawi a. Thlalak lam a tui mi te tan ‘Zalenna leh ralmuanna pho lang thei hlimthla’ tih thupui hmang a inelna buatsaihna chuan thla latute leh heng thlalak thlirtute thinlungah ram leh hnam hmangaihna a kaih harh ngei a beisei thu a sawi.

Pu Hmingthanzuala, DIPRO tarlan danin Remna Ni 2023 pual a Photography Competition-ah hian mi 14-in ni 26, June, 2023 thleng khan thlalak an thehlut a, thlalak hi pakhat aia tam thehluh theih a nih angin thlalak lut zawng zawng hi 45 a nih thu a sawi. Photography Competition hi Kolasib District Remna Ni 2023 Celebration Committee thuchhuak angin I&PR leh ZOOM hruaituten ruahmanna siamin buatsaih a ni a, Pu John LT Sanga, Deputy Commissioner, Pu Hmingthanzuala, DIPRO, Pu Christopher JZ Lawlor, Vice President, ZOOM leh Pu Lalhmachhuana, Adviser, ZOOM ten vawiin khan an endik a ni. Digital Camera Category lawmman pakhatna hian lawmpuina thuziak leh pawisa fai cheng 2000, pahnihnain cheng 1500 leh pathumna hian cheng 1000 a keng tel a, Mobile Phone Category-a pakhatna hian cheng 1000, pahnihna in cheng 750 leh pathumna in cheng 500 a keng tel bawk a ni. Ni 30, June 2023-a Diakkawn YMA Hall-a Remna Ni lawmna hun ah lawmman hi semchhuah a ni dawn a ni.

Remna Ni 2023 lawmna pual a Photography Competition buatsaih, Digital Camera Category-ah hian Pakhatna chu Carter Lalchhuanmawia, College Veng a ni a, Saithangpuia, Venglai chu pahnihna niin C.Zonunfela, Venglai chu pathumna a ni. Mobile Category-ah hian Laldinpuia, Hmar Vengin lawmman pakhatna a la a, Lallawmsanga, Hmar Veng chu pahnihna niin C.Zonunfela, Venglai chu pathumna a ni bawk.