942/2023-2024

Lunglei the 27th June, 2023: Lunglei Municipal Council (LMC) Board of Councillors Meeting hmasa ber chu vawiin chawhma dar 11:00 khan BoC Meeting Hall LMC Office ah neih a ni a, BoC Meeting hmasa ber hi Pu Lawmawma Tochhawng MLA, HPC Vice Chairman in a telpui.

LMC Board of Councillors Meeting hi LMC Chairman Pu Lalzuithanga'n a kaihruaia meeting-ah hian kum 2023 atanga 2024 chhunga LMC hmalakna tur engemawzat Councillors ?hukhawm te hian an pawm a ni. Vawiina LMC BoC Meeting chuan Lungleia Solid Waste Management Centre UD & PA Department enkawl chu a nih tur anga kalpui a la nihloh bakah Solid Waste Management Centre pakhat ringawt chu hun lo kal zel turah Lunglei khawpui tan a tawk dawn lo tiin Lunglei khawpui chhung hmun pali, Lunglei East, West, South leh North ah te Solid Waste Management Centre changtlung zawk din tura hmalak nise an ti. Hei bakah hian Lunglei khawpui chhim leh hmar lamah Truck Terminal buatsaih tum nise tih te, LMC huam chhunga hmun pawimawh enkawl that leh cheibawl that, Urban Local Body Fund atanga siam turin Rain Water Harvesting Project siam, LMC Complex nei tura hmalak, Mizoram Municipalities Rules & Act hmanga a theih chin chinah LMC chhunga hmalak nise hemi hma hian Draft Lunglei Municipal Council Rules By Laws siam hmasak nise tih leh thil pawimawh dangte an pawm a heng hmalakna tur hrang hrang an pawm takte hi chipchiar zawkin Mizoram Sawrkara Cabinet Meeting pawmpui turin thehluh a ni ang. Vawiina LMC BoC Meeting-ah hian Account Committee member atan Pu Lalramzauva Ward No- IV, Malsawmkimi Khawlhring Ward No-VIII, R.Lalremsiama, Ward No-VI leh Judy Lalhriatpuii, Ward No- X te chu lungrual takin an pawm a ni.

LMC Board of Councillor Meeting hmasa berah hian Meeting kaihruaitu LMC Chairaman Pu Lalzuithanga chuan LMC chu bultan chauh tur an nih avangin Councillors te pawh a taka hnathawhna tur sum hmuh a nih hmaa nasa zawk a inzir tur leh an ngaihtuahna te hmang zau a, sum hmuh a nih veleh chak taka hnathawk thei nghal tura in tuaihriam turin a ngen a. BoC Meeting chu Quarter khat dan zela neih tur ni mahse bultan tur kan nih avangin Meeting neih zin angai dawn a ni a ti.

Boc Meeting telpui tu Lunglei HPC, Vice Chairman Pu Lawmawma Tochhong pawhin LMC a Councillors te chu an hmalakna tur hmachhawp tam tak an neihte ti hlawhtling tura theihtawp chhuah tur leh nakin hun lo la awm zel tur thlir chunga Lunglei hmasawnna hna thawh thiam a tul ti hria se a duh thu sawiin, sawrkar nen pawh tha taka an thawhho zel a beisei thu a sawi a ni.

Vawiin LMC BoC Meeting-ah hian LMC Chief Executive Officer, Pu H.Lalhmingthanga, MCS, leh LMC Secretary Pu Vanlalrova, MCS te  an tel a ni.