2671/2023-2024

Champhai the 5^th November, 2023 – November ni 7, 2023 (Thawhlehni) a Mizoram Assembly Election 2023 hmachhawn tura Champhai District inpuahchahna te thlir hovin vawiin khan Champhai DC Conference Hall, Keifangtlangah Election Observer te hovin meeting neih a ni.

He meeting hi 23 Champhai North AC, leh 24 Champhai South AC General Observer Dr Ranjit Kumar Singh, IAS; 25 East Tuipui AC General Observer Pu Sanjay Kumar, IAS; Champhai District Expenditure Observer Pu Abhishek J Jain; leh Champhai District Police Observer Pu Sukesh Kumar Jain, IPS te leh Champhai DC&DEO Pu James Lalrinchhana, Champhai SP Pu Vineet Kumar-te kaihhruaina hnuaia neih a ni.

Meeting-ah hian Election hmachhawn tura Champhai District inpuahchahna hrang hrang chipchiar taka en nawn ho leh a ni a. Election Observer-te chuan Election hmachhawn tura Champhai District inpuahchahna leh ruahmanna awm hrang hrangte tha an tih thu sawiin, Inthlan Ni ah Polling Station tin atanga a hun taka Report te a luh khawm theihnan leh Polling Parties ten harsatna engpawh an neih te an Report zung zung theihnan Poll Day Communication Plan siam chu tha taka kenkawh ngei ni se an ti a. Venhimna hna thawk tur CAPF leh Police-te tana Police Control Room pawh tha taka kenkawh ni se an ti bawk a ni.

Champhai DC&DEO Pu James Lalrinchhana chuan Sawrkar hnathawkte, Kohhran te, MPF, Media, leh NGO hrang hrangte inpekna leh thahnemngaihna zarah Champhai District-ah campaign chhungin boruak ralmuang tak a awm thu sawiin, Inthlan chu hlawhtling taka neih ngei a beisei leh a rin thu a sawi a ni.

Champhai SP Pu Vineet Kumar chuan Dan leh thupek kenkawh leh venhimna hnathawk tura Police hmalakna report a pe a. Kumin Inthlanah hian Champhai District-ah a vawikhatna atan Polling Station tinah (Hmeichhe hlang duty na Pink Polling Station paruk tiam lovin) armed police an duty tel dawn a. He hmalakna hi Secuirty lama hlauhthawnawm a awm vang ni lovin, Election kaihhnawihah venhimna tha zawk neih anih theihna tura hmalakn a ni a. Armed police duty tel tur hian Police Headquarters (PHQ) Mizoramah phalna lak niin, 2^nd IR Battalion Khawzawl atangin duty tur te hi an lo kal a ni. Security kaihhnawihah Champhai District chu Zone 5-ah then niin, heng Zone te hi anmahni bial tu theuh Police Zonal Officer ten uluk takin an vil a. Engtik lai pawha a tul a che chhuak nghal thei Quick Response Team (QRT) pawh paruk siam belh niin tun dinhmunah QRT Team pakua an duty mek a. Police ten duty naah harsatna engpawh an neihte an report zung zung theihna tur Police Control Room pawh siam niin mi pakua (9) in an vil a ni.

Champhai District a Polling Station 84 awm te hi P-1 vek niin, Polling Parties te hi November ni 6 ah vek DC Office, Keifangtlang atangin an chhuak dawn a. Polling party-te phur tur hian Bus paruk (6) leh MaxiCab 71 te ruahman a ni a. Polling party te hi zing dar 9:30 atanga Despatch Centre atanga chhuak hman thei tura beisei niin, Polling station hla a duty tur te an chhuak hmasa anga, khaw chhunga duty tur te chawhnu lamah an chhuak ang.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a ni.

23 Champhai North ah leh 24 Champhai South ah te mipa aiin hmeichhe voter an tam zawk a ni. 

Voter Tamna ber Polling Station – 24 Champhai South hnuaia 24/12 Champhai Vengthar niin Voter 1346 an awm a ni.

Voter Tlemna Ber Polling Station chu 23 Champhai North hnuaia 23/21 Keifangtlang niin Voter 78 an awm a ni.