4719/2024-2025

Champhai, 20th March 2025: Election Commission of India thuchhuak bawhzuiin vawiin khan Champhai DC Conference Hall-ah Bawrhsap, District Election Officer ni bawk Pu Mohammad Aaquib a hovin District chhunga Political Party hruaitute an ṭhukhawm a. He hunah hian Electoral Roll buatsaih dan leh Inthlan hrang hrang buatsaih dan chungchang te sawiho a ni.

Thutkhawm kaihruaitu Pu Mohammad Aaquib chuan Electoral Roll felfai leh dik tak neih chu democracy lungphum pawimawh tak a nih thu sawiin, khua leh tui dik tak te chauh roll-ah an chuan theih nan sawrkar, political party leh tlawmngai pawl te inkarah thawhhona ṭha a awm a ṭul a ni, a ti a. Kum 18 tling thar ten roll a inziahluh nachang an hriat theih nan lo bengvar ṭhin turin political party aiawh kalkhawmte chu a chah bawk.

Vawiin ṭhutkhawmah hian Electoral Roll a hming paih, inziahluh leh insawn chungchang te sawiho a ni a. Kum upa leh vohbik (PwBD) ten mahni inlum ngeia vote an thlak theihna - Home Voting Facility pawh tun aia huap zau zawka kalpui theih dan tur ngaihtuahho a ni bawk. Political Party-te rawtna bakah hian District chhunga Electoral Registration Officer-te ngaihdan pawh lak a ni dawn a, rawtna te hi District Election Officer hmingin Chief Electoral Officer (CEO) Office-ah thehluh a ni dawn a ni.

Vawiin ṭhutkhawmah hian Pu H. Lalbiaknia, SDC; Election Office a thawktute leh Political Party aiawhte an tel a ni.