4813/2024-2025

Champhai,25th March 2025: Vawiin khan Champhai District Hospital chuan Damdawiin Fai lawmman ‘Kayakalp’ kum 2023 a lawmman pakhatna an dawn leh kum 2024 a lawmman pahnihna an dawn bakah kum 2023-a Eco Friendly Award-a lawmman pahnihna an dawn lawmna hun an hmang a. Health & Family Welfare Minister Pi Lalrinpuii chuan khuallian niin he hun hi a hmanpui a. Champhai North bialtu Er. H. Ginzalala leh Champhai South bialtu Lt. Col. Clement Lalhmingthanga ten khual zahawm niin an telpui bawk a ni.

ZNS Picnic Spot, Mualkawia lawmna inkhawmah khuallian Pi Lalrinpuii chuan Health & Family Welfare Department hmasawnna lo lang chhuak ṭhin chu lawmawm a tih thu sawiin  Kayakalp chawimawina mai bakah NQAS Certification dawng thei Champhaiin District Hospital a nei chu mipuite tan pawh a thlamuanthlak hle a ni, a ti a. Champhai District Hospital-in Kayakalp lawmman a dawn theihna tura thawktu Group D staff-te chawimawina a hlan chu lawmawm a tih thu a sawi a. Mizoram sawrkar chuan kum 2026 ral hmain damdawiin zawng zawngin NQAS Certification an hmuh theih nan hma a la mek ani tih a tarlang bawk.

Pi Lalrinpuii chuan Mizoram sawrkarin a thil tum a tihlawhtling mek zel tih sawiin, mipuite phurrit chhawk zangkhai turin ruang phurh man sawrkarin a tum tawh a; hei bakah hian mipui ten man chawi lova damdawiin a inenkawlna an dawn theihna tur - Mizoram Universal Health Care Scheme pawh Chief Minister-in a tlangzarh tawh a ni, a ti a. MUHCS hi State pawn damdawiin 18 ten an rawn zawm tawh tih sawiin, Urban Primary Health Centre (UPHC) zawng zawngah damlo admit thei tura ruahmanna kalpui mek anih thu a sawi bawk. Health Minister hian thawktu indaihlohna phuhru turin nurse 300 lakna tur advertisement tihchhuah a ni tawh a, District Hospital tinah mipuite lo chhawn tu tur Public Relations Officer leh Health Care Scheme mumal taka a kal theihna turin Data Manager pawh lak an ni dawn tih a tarlang.

Health Minister chuan Mizoram sawrkar hnuaia ICU function lo zawng zawng function tura hmalak mek anih thu a sawi a. Champhai District Hospital-ah Mizoram Health System Strengthening Project aṭangin CT Scan bun tum anih thu leh rampum huapa specialist doctor indaihlohna phuhru turin Specialist pakua lakna tur advertisement tihchhuah anih tawh thu a sawi bawk. Pi Lalrinpuii hian ZMC&H-ah Cabin 30 function tir tum anih thu te, Open Heart Surgery kalpui thei tura ruahmanna kalpui mek a nih thu te, IVF tithei tura ruahmanna a awm mek thu te a sawi a ni.

Thusawitu dang Adviser to Chief Minister (Technical) Er. H. Ginzalala chuan Champhai District Hospital-a thawktute hnathawh ṭhat zar a lo lang leh ta chu ropui a tih thu a sawi a. Damdawiin a lo changtlun zel theihna tura Mizoram sawrkar inphalnaah lawmthu sawiin, thawktu indaihlohna phuhru turin hna lakna tur advertisement tihchhuah anih tawh thu leh Hnahlan PHC-ah X-Ray khawl bun anih tur thu a tarlang a ni. Champhai North bialtu MLA hian Swadesh Darshan 2.0 hnuaiah Champhai Vengsanga Cultural & Heritage Centre sakna tur cheng vaibelchhe 33.8 leh Keilungliah leh a chhehvel cheiṭhatna tur cheng vaibelchhe 38.8 sawrkar laipuiin a pawmpui tawh thu pawh tarlangin, theihtawp chhuahpuitu Tourism Minister Pi Lalrinpuii chungah lawmthu a sawi a ni.

Champhai South bialtu MLA Lt. Col. Clement Lalhmingthanga chuan he hunah hian Champhai District Hospital-in Award hlu tak tak, midangte tana inhlanna lam hawi chawimawina an dawng chu  a lawmpui thu a sawi a. Champhai District Hospital chu District mipuite mai ni lo, ṭhenawm ram aṭanga sahimna rawn zawngtute thlenga chhawmdawltu an nih thu sawiin anmahni pantu zawng zawng te tana theihtawp chhuah ṭhin Hospital thawktute inpekna leh tlawmngaihna chu ropui a tih thu a sawi a. Champhai South MLA hian Health Minister Pi Lalrinpuii enkawlna hnuaiah Health Department hmunhma leh kalphung ten hmasawnna hmel an hmu zel chu lawmawm a tih thu a sawi bawk a ni.

He hunah hian District Hospital-in Kayakalp lawmman a dawn theih nan a thawktute hnenah lawmman hlan a ni a.  Champhai District chhunga tlawmngaia thisen pe tam te hnenah chawimawina hlan a ni a. Chungte chu:

1. Pu PC Lalchuangkima, Champhai Bethel Veng (Unit 94)

2. Pu PC Zoremsiama, Champhai Vengthlang , (Unit 54)

3. Pu Lalmuanzova, Champhai Zotlang (Unit 54)

4. Nl F. Lalchhanhimi, Champhai Vengthlang, (Unit 37)

5. Nl Chawngzikpuii, Champhai Vengsang (Unit 35)

6. Nl. Lallawmpuii, Champhai Electric Veng (Unit 32); te an ni.

Kayakalp hi sawrkar laipuiin India ram faina tur hma a lakna Swachh Bharat Abhiyaan hnuaia mi niin, sawrkar damdawiin leh a vel te fai taka vawn anih theih nan Health & Family Welfare Department hnuaiah kum 2015 aṭangin kalpui a ni. He scheme-in a tum ber chu Sawrkar damdawiin ten damlo te hnena enkawlna ṭha zawk (Quality Health Care Service Delivery) an pek hi a ni. Chu mi ti thei tur chuan - natna inkaichhawn theih darh tur ven te, damdawiin bawlhhlawh sawngbawl dan dik taka sawngbawl leh paih te, hmunhma faina leh mawina te, thawktute hawihhawmna leh thiamnate tehfung (Kayakalp checklist) hrang hrang hmanga endik a ni a, a tiṭha te chawimawina leh lawmpuina atan lawmman (sumfai)tha tawk tak pek an ni. Inelna hi District Hospital, CHC, UPHC, PHC leh HWC te tan neih ṭhin a ni.

Kayakalp lawmman dawn lawmnaah hian Dr. Zatluanga, District Medical Superintendent chuan kalkhawmte lawmna thu a sawi a. Pi H. Lalrinzami, Nursing Superintendent in lawmthu sawiin inkhawm hi a khar a ni.