4814/2024-2025

Lawngtlai, 26th March, 2025 : Vawiin khan Urban Development & Poverty Alleviation (UD&PA) Department bultumin School Bungraw Inthleng Runpui (Swap & Safe) hawnna inkhawm DC Office kawtzawlah neih a ni a. Pu Cheemala Siva Gopal Reddy, IAS, Lawngtlai bawrhsap  chuan hawnna neiin a hmanpui. 

Pu Cheemala Siva Gopal Reddy chuan zirlai naupang leh nu leh pa lokal khawmte hnena lawmthu sawina a nei hmasa a. Zirlai bu, uniform leh zirna atana tangkai thei thil te  paih mai lo a inthleng a nih   dawn avangin, sum leh pai tam tak khawhral tur venna tha tak a ni, a ti. Zirlai naupang leh nu leh pate pawh zirlaibu leh uniform hlui an neihte lo tiral mai lo a, hetiang hun lo ngaichang thin turin a ngen  a. Bawrhsap chuan School Bungraw inthleng runpui chu chin tha tak ni a ahriat thu sawiin, hmalam hunah pawh chhunzawm zel tlak a nih thu a tarlang. Ni  thum chhung awh tur a nih angin Pu Cheemala Siva Gopal Reddy chuan zirlai naupang, nu leh pa tam zawk he hun lo chhim tura sawmin, hlawk taka hmang tangkai turin duhsakna a hlan nghal bawk. 

School Bungraw inthleng runpuiah hian zirlaibu, uniform, pheikhawk leh zirna atana tangkai tur thil chu kenkhawm niin, mamawh neih ang angte  a thlawn a  lak theih a ni a, bungraw inthleng te  chu  fel fai taka chhinchhiah a ni.

Vawiin hun hmanna hi Pi Margaret J. Vanlalremmawii, DPO, UD& PA, Lawngtlai chuan kaihruaiin, zirlai naupang, nu leh pa thahnem tak an tel thei a. School Bungraw inthleng runpui hi ni thum  ( 26th - 28th March ) chhung hman tur niin, zing dar 10: 00 atanga tlai lam dar 5:00 thlengin hun hman thin a ni ang.